Shillong, Rymphang 07: U kyrtong ka Bharatiya Janata Party (BJP) na Mawsynram constituency bah H. M Shangpliang hynne ka sngi ula iathuh ba ka mat ba hakhmat eh ha kane ka ilekshon kadei naka bynta ban pynioh Sub Civil Division iaka Mawsynram bad ban shna pynheh iaka surok na Mawngap sha Balat.
Haba kren hadien ka jingthep kyrteng u bah Shangpliang ula iathuh ruh ba ha ki snem bala dep ula iakren bad u Myntri Rangbah ka jylla ban pynbna noh daka Sub Civil Division ha Mawsynram naka bynta ban wanrah shuh shuh iaki kam pynroi hapoh ka thain hynrei naka liang ka sorkar kam shym la leh eiei naka bynta ka jingmyntoi ki paidbah ka Mawsynram.
“Ha ki snem bala dep, nga la iakren bad u Myntri Rangbah halor ka jingdonkam ban pynkha noh iaka Sub Civil Division iaka Mawsynram naka bynta ban wanrah ka synshar khaddar khamjan bad u paidbah hynrei haduh mynta u Myntri Rangbah um shim khia halor kane” ong u bah Shangpliang
U bah Shangpliang ula ong ba lada ka BJP ka ioh ban thaw sorkar hadien kane ka elekshon, un shim ka jingkitkhlieh ban pynthikna ba ka Mawsynram kan ioh noh daka Sub Civil Division.
U bah Shangpliang ula ong ruh ba kala donkam ban palat ban pynheh iaka surok na Mawngap shaduh Balat namar kane ka surok ka long ka budlum iaki paidbah khamtam iaki nongrep ban shalan iaki mar mata sha ki iew ki hat.
Ula ong ruh ba kane ka surok kan kyntiew iaka ioh ka kot ki paidbah namar kan kyntiew iaka kam jngohkai pyrthei daka ba wanrah ki lad lynti ban pynioh kam ioh jam iaki samla lyngba ki kam jngohkai pyrthei namar ka Mawsynram ruh ka don bun ki jaka ba itynnad kum ka thain Sohra.
Shuh shuh ula bynrap ba ka jingkynthih na kawei ka party sha kawei pat kan nym ktah ia u ha kane ka elekshon namar ki paidbah bad ki nongkyrshan hi kiba ialam lynti ia u ban iasoh sha ka BJP.
“Ki paidbah kila pynpaw ha nga, ba lada donkam ban phet seng, dei ban phet sha ka BJP namar dei tang ka BJP kaba lah ban wanrah iaki kam pynroi kiba myntoi ia baroh lang” la ong u bah Shangpliang.
Haba ther iaka jingkynnoh ba ka BJP kadei ka Party ba ibein rit paid bad riew ngeit Kristan, u bah Shangpliang ula ong ba kine baroh kidei tang ki jingkynnoh khlem nongrim kiba la kynnoh da kiwei ki Party tang naka bynta ban ioh jingkyrshan naki paidbah lyngba ka jingialam bakla pyrshah iaka BJP.
