Guwahati, Rymphang 06: U MP ka Seng Congress u Gaurav Gogoi ha ka sngi Saitjain ba la lah u la kynthoh tyngeh ia ka sorkar Assam ha kaba iadei bad ka jingkhynra pyrshah ia ka kam pyniathoh shongkurim khynnah ha ka jylla.
“Ka dei ka kam leh shimet jong u Myntri Rangbah (CM) ha kaba hapoh ka jingsynshar ka jong ki, kiba bun bah ki kam pyntriem, kum ki kynhun runar mafia, ki kam thombor pyrshah ia ki kynthei bad kiba la noh rta, ki kam khaii drok bad ki kam rahbor ki la kiew arsut.Ki bor pulit kila shah hukum ha ki iingbishar High Court halor ka jingpulom ha kaba pynlong ia ki jingtohkit khamtam ha kaba iadei bad ka case ka jingshah pyniap jong Arnamai Bora,” pynpaw u Gaurav Gogoi lyngba ka twitter.
Da kaba khot ia kane ka jingkhynra kum ka kam pynlut por ka bym don nongrim, u Gogoi u la ong; “La iohi kumba ki pulit ki la ioh ia ka jingbthah ban tohkit halor ki case kiba la sahteng da ki phew snem kiba khlem da bud ia ki kyndon ain.Ka dei tang ka kam pynlut por ka bym don nongrim.”
Na ka liang ka sorkar Assam ka la sdang ia ki jingkhynra pyrshah ia ki kam pyniathoh shongkurim khynnah ha kaba ki bor pulit ki la ioh ban kem noh haduh kumba 2258 ngut ki briew kiba don bynta ha kiba kum kine ki kam kiba beain kiba ktah ia ka imlang ka sahlang.Na ka liang ki pulit ki la ong ba ki la don ia ka list jong kumba 8,000 ngut ki briew kiba la shah kynnoh donkti bad ka jingkhynra ka dang iai bteng.
Ia kane ka jingkhynra la sdang naduh kane ka miet sngi Palei ba la lah hadien ba u CM ka Assam u Himanta Biswa Sarma ula khot pynlong ia ka jingialang lyngba ka online bad ki heh na ka tnat pulit, kata da kaba hukum ia ki ba kin pynlong ia ki jingkhynra ban pyllait ia ka jylla na kino kino ki kam pyniathoh shongkurim khynnah kiba long beain bad kiba ktah ia ka imlang ka sahlang.
Haba kren sha ki lad pathai khubor u Himanta Biswa Sarma u la ong, “Ka jingkhynra halor ki kam pyniathoh shongkurim khynnah kan dang iai bteng haduh ka ilekshon assembly ka ban long ha ka snem 2026.Kito kiba don bynta ha kane ka kam beain kin ngat ha ka jingshah pynshitom kaba tyngeh.”
