Bajengdoba, Rymphang 02 : U Symbud Lamphang ka Iingdorbar bad Nongialam ka NPP Timothy D Shira hynne ka sngi palei ula kynnoh ba u Dr Mukul Sangma u dei u briew ba bamsap tam bad uba bam da ki klur ym shuh da ki lak.
Ula ong ba ym don satia mano manor uh kiba lah ban iatreilang bad ki Nongialam ka Trinamool Congress bad khamtam eh u Nongialam ka Liang Pyrshah Dr Mukul Sangma.
U Timothy ula kren ia kane ha ka rally ialap elekshon jong ka NPP ha Bajengdoba, North Garo Hills hynne ka sngi palei, kaba la iashimbynta da u Myntri Rangbah ka Jylla bad National President ka NPP Conrad K Sangma nalor ki hajar ngut ki paidbah.
“Ha kane ka elekshon, u Dr Mukul u kwah lut ia kiei kiei baroh halade ha ka por ba u dang don ha ka Congress bad haba u (ma Vincent) Pala ula shah thung kum u President, ula sngewthuh ba un ym lah ban leh eiei shuh bad ka party kumta ula pyniasoh sha ka TMC” ula ong.
“Ka TMC kan nym jop wat shi seat ruh ha Khasi Hills…ha Shillong, ki kyrtong jong ki, kila phet ban iakhun noh kum ki kyrtong shimet namar ki sngewthuh ba ki paidbah kim pat pdiang ia ka TMC” ula bynrap.
Haba pan ia ka jingkyrshan na ka bynta u kyrtong ka NPP Pongseng marak, ula ong ba hapoh ka jingialam u Conrad kum u Myntri Rangbah, ka North Garo Hills kala ioh shibun ki kam pynroi kum ka song pisa T. 2.69 klur n aka ANB ban shna pynbna ia ki jaka pule, T. 80 klur ban pynbha ia ki surok, bad ka jingkieng Damring kaban sa tei da ki klur tyngka ban iada na ka jingshlei um.
Haba thalain ia ka TMC bad u Dr Mukul Sangma ba nang tang ban ud, ula ong ba ka surok German technology ba u Mukul u ju kren bha kam shym la neh wat tang 2 snem. “Iaka Ganol Project, u Dr Mukul ula pynlut T. 500 klur hynrei u khlem lah pyndep katba u Conrad ula lah ban pyndep tang hapoh ka T. 300 klur” ula ong.
Ula kynnoh ruh ia u Dr Mukul Sangma ba u dei uba shet kylla ia u (L) PA Sangma, uba wan ialam ia u sha ka jylli sain pyrthei.
Ula kynnoh ruh ia une u Nongialam ka TMC ba u dei uba bamsap bha naduh ba u long u Myntri ka Tnad bording ha u snem 2009.
“Ula shna pisa ha ka por ba u long Myntri kam bording ha u 2009. Ula pyllait ia ki tender ban shna ia ki hydel project bad ki kompani kila siew da ki klur ban ioh ia ki tender hynrei shaei kine ki project mynta?” ula kdew
Ula kren ruh halor ka jingdon nongkynti jong u Dr Mukul Sangma bad ong ba u Dr Mukul ula thied ia u dewiong ba kot da kimklur na Kallu Rengdim, Wesr Khasi Hills, thied ia ka jaka ba palat T. 50 ha Mendi, u don ka Iing ha Shillong ba kot da ki klur tyngka nalor kiwei kiwei. “U Mukul um bam shuh da ki lak hynrei da ki klur” ula kam.
