Nongpoh, Kyllalyngkot 31: Ka KSU Nongpoh Circle hynne ka sngi ba-ar kala pynkup burom ia uwei u samla ialehkai uba la wanrah nam na ka lympung ialehkai Karate ba dang shu dep long ha Kolkata.
Une u samla u dei u Francis Makri uba dei n aka thainRi-Bhoi bad uba dei ruh u dkhot ka KSU. Une u samla ula leit iashim bynta ha ka 2nd OYAMA cup 2023 ba la pynlong daka International Federation of Karate (IFK) Kyokushin jong ka ri India, bad u la lah ioh khur iaka takma ksiar haka jingiakop ka ba 65 kilo sha jrong.
Ia une u samla la pynkup burom da ka KSU hapoh ka jingialam u President John Lyngdoh bad u Secretary Baiashanlang Kharshanlor.
Haba kren sha ki lad pathai khubor, u Samla Baiashanlang Kharshanlor u la pynpaw ka jingsngewnguh ia u samla Francis Makri ba lyngba ka jingtrei shitom jong u shimet, u la lah ban wanrah iaka burom naka bynta ka jylla, bad u la ong ruh ba ka seng KSU ka dap daka jingkmen ka ba khraw ban iohi ba une u samla uba dei ruh u dkhot ka KSU ba un poi shaduh kane ka kyrdan, ba wat hapdeng ki jingeh kiba bun ba une u samla u hap ban ïaid hynrei u khlem kynrandien bad u la tur shakhmat haduh ba u la lah ban khur syndon ia u takma ksiar ha katei ka lympung ka ba heh ka ba dang shu dep long ha calcutta.
Shuh shuh u la ong ba naka liang ka sorkar bad ka tnad ba dei peit iaki kam ialehkai kam ju da kham phai khmat sha kum kine ki jingialehkai, bad dei hangne ba bun ki samla kiba don iaka sap ki hap ban kynran dien noh namar ba kim lah ban kyrshan ha ka ba iadei bad ki bai kut bai sep.
U la ong ruh ba ka seng ka khuslai ba ioh bun ki khynnah samla kiba don iaka sap ialehkai kin ngop noh sha ka kam kai bad ioh ki pynlehnoh ei noh iaka sap ka ba la ai kyrpang da u blei namar ka jingbym don lad don lynti ban pynpaw iaki sap ba ki don.
Ula kyntu iaki tnad ba dei peit bad ia kano kano ka kynhun ka ban sa thaw iaka sorkar ka ba thymmai ha kane ka election ka ba mynta, ba kin sngewbha ban phai khmat kyrpang sha ki kam sports, namar ba bun ki samla kiba don iaka sap bad ki samla kiba ju wan rah nam bad burom iaka jylla lyngba ki kam sports ki dei ki samla kiba wan naka longïing ki ba duk bad naki jaka kiba kham kyndong ki bym don wat iaka jaka ba kin ioh ban kilan met bad ban pynkhreh ialade shwa ba kin leit sha kano kano ka jingiakhun.
