Agartala, K’lyngkot 30: U Myntri Rangbah (CM) ka Tripura u Manik Saha hynne ka sngi Nyngkong u la leit ban thep kyrteng na ka bynta ban iakhun ha kane ka ilekshon assembly ka ban wan ha ka jylla.Ia u Saha la synran lang da u CM ka Assam uba dei ruh u convenor ka NEDA u Himanta Biswa Sarma bad u CM ka Manipur u N. Biren Singh.
U Saha u la leit ban thep kyrteng kum u kyrtong ka BJP napoh Bardowali constituency ha Tripura.
Haba kren sha ki lad pathai khubor, u Himanta Biswa Sarma u la ong; “Ngin thaw biang ia ka sorkar ha Tripura.Ngi la rai ban iakhun marwei ha kane ka ilekshon ha Tripura, hynrei ka IPFT ka don ryngkat bad ngi, bad ha kane ka kynti kaba mynta ngin ia aireng ryngkat lang bad thaw ia ka sorkar.”
“Ngi don tang kawei ka thong, kata ka long ka roi ka par.Ha ki san snem kiba la dep, ka BJP ka la trei na ka bynta ban wanrah ia ka jingsuk bad ka roi ka par ha Tripura,” ong shuh shuh u CM Sarma.
Halor ka jingiateh hapdeng ka CPI(M) bad ka Congress, u CM ka Assam u la shim ia kane ka jingiatreilang ka jong ki kum u nod (zero) bad ong ba ka Congress bad ka CPI(M) ki long nod ha baroh kawei ka ri.
“Kane ka jingiasynrop lang kam dei ka mat kaba khraw na ka bynta jong ki.Ka Congress ka dei u nod uba heh ha ka ri baroh kawei, katba ka CPIM ka dei sa kawei u nod uba heh ha ka pyrthei baroh kawei, bad lada phin khein lang ia baroh ki jingmih kin long nod,” ong u Sarma sha ki lad pathai khubor.
Ka BJP ha ryngkat ka paralok synrop jong ka, ka IPFT ki la pynkhyllem noh ia ka Left Front ha Tripura ha ha ka ilekshon assembly 2018 da kaba jop haduh 44 seat ha ka iingdorbar assembly kaba don 60 ngut ki dkhot, kaba la pynkut noh ia ka jingsynshar ba 25 snem jong ki kaba la sdang naduh ka snem 1993.Ka CPI-M ka la ioh tang 16 tylli ki seat ha katei ka ilekshon 2018.
