Dimapur, K’lyngkot 29 : Ki paralok synshar synrop ha Nagaland ka BJP bad ka Nationalist Democratic Progressive Party (NDPP) ki lah ban pyniabiang ha kaba iadei bad ka jingiapynbeit kaba kham hashwa halor ka rukom iabhah ia ki seat kaba long 40-20 na ka bynta kane ka ilekshon assembly ka ban long ha ka 27 tarik u Rymphang 2023.
Ki tyllong khubor ka BJP ki iathuh ba ki nongialam ka jylla bad central ki la pynlong ka jingiakren bad ki nongialam ka NDPP na ka bynta ban bhah sa sawtylli ki seat na ka bynta ka BJP namar ki don shibun bah kiba thrang ban ioh tiket na kane ka party ha baroh kawei ka jylla.
Ka jingjur ka jingdawa tiket naduh kane ka taiew ba la dep ka la pynlong ia ki ba kin ialum hapoh ki ophis jong ka party ban pynbor ia ki nongialam ka jylla ba kin pynioh tiket na ka party BJP.
Ka NDPP bad ka BJP ki la ia aireng ha ka ilekshon assembly 2018 da 40-20 ka jingiabhah seat, bad kine ki paralok synrop ha u bnai Naitung jong u snem ba la dep ki la shim ia ka rai bai bteng ia kane kajuh ka jingiasngewthuh jingmut.
Ka BJP ka la pan sa sawtylli ki seat na ki ja ka sor jong ka Kohima Town, Mon Town, Tuensang Sadar-II bad Wokha, kata nalor ka bhah ka 20 tylli ki seat. Na ka liang u Myntri Rangbah uba dei ruh u nongialam ka NDPP u Neiphiu Rio la ong ba u la mynjur ban bhah sa sawtylli ki seat sha ka paralok liang synshar.
Ka jingialang jong ka BJP Nagaland state election committee kaba la long ha kane ka sngi Saitjain ba la lah kala iamir jingmut halor kina bun ki mat kiba iadei bad kane ka ilekshon.
Ia kane ka jingialang la lamkhmat da u state president u Temjen Imna Along bad la wan iashim bynta da u Symbud Myntri Rangbah u Y. Patton u nongaiktien ka BJP na Central u Nalin Kohli bad kiwei.
Ki nongialam ka BJP bad ka NDPP kaba kynthup ia u CM Rio wat hapdeng kane ka jingbym sngewsuk halor ka rukom ai tiket hynrei kham hashwa ki la pynthikna ba kam don kano kano ka jingkylli kaba iadei bad ka jingpynkylla ia ka jingiabhah seat kaba 40 ka NDPP bad 20 ka BJP.
Ki katto katne ki nongialam ka BJP, khatam kitp kiba kwah tiket ki la banbor ia ka sorkar synshar synrop United Democratic Alliance (UDA) ban shah ia ka BJP ba kan iakhun na ki 30 tylli ki seat.
“Lada ka BJP ka ba don tang arngut ki MLA ha Meghalaya ka lah ban pynieng na baroh ki 60 tylli ki seat, kumta ruh balei ba ka party ka ba don 12 ngut ki MLA ha Nagaland kam lah ban ioh ia ka bhah ka ba 30 seat? ” Ong u nongialam ka BJP.
Ki nongialam ka BJP ha Meghalaya ki la pynbna ban pynieng kyrtong na baroh 60 tylli ki seat pyrshah ia ka kynhun synrop National People’s Party (NPP) ba khlainbor ka ba ialam ia ka sorkar Meghalaya Democratic Alliance (MDA).
