Guwahati, K’lyngkot 27:U Myntri Rangbah (CM) ka Assam u Himanta Biswa Sarma ha ka sngi Palei ba la lah u la ong ba ka jingsuk ba pura kan wanphai ha ka jylla tad lada u nongialam ba hakhliehduh jong ka seng ULFA(I) u Paresh Baruah un wan sha ka jingiakren bad ka sorkar.
Haba kren ha ka jingrakhe Republic Day kaba 74 jong ka ri hapoh veterinary field, Khanapara, u CM Himanta Biswa Sarma u la kyntu ia ki dkhot bad ki nongialam jong ka ULFA(I) ba kin wanphai sha ka lynti kaba dei bad ban trei na ka bynta ka roi ka par jong ka jylla.
“Nga kyntu ia u nongialam ka ULFA(I) u Paresh Baruah ban pynkut noh ia ki kam iaumsnam bad ban wanphai pat sha ka lynti kaba dei bad ban iashim bynta ha ka jingiakren.Ha ka por ba u Paresh Baruah ula kieng atiar, ka jinglong jingman ha Assam ka pher shibun, hynrei mynta ki kam pynroi ki la kiew sted bha ha ka jylla.Ka sorkar jong ngi ka la trei borbah ha ka liang ka roi ka party ha Assam, ngi da shim khia ruh ha kaba iadei bad ka jingpyrshang ban weng noh ia ki jingeh kiba iadei bad ka seng ULFA(I),” ong u Sarma.
Ha ka 21 tarik mynta u bnai utei u nongialam ka seng lehnoh ULFA(I) u la pynpaw shai ba kin ym pyndem hakhmat ka sorkar India.Nalor kata u la ong ruh ba kin bteng ia ka jingialeh katba ka jingdawa ia ka jingsynshar hi kam pat urlong.
Lah ban kdew ba u CM Sarma ha ka 20 tarik mynta u bnai u la ong ba ka sorkar Assam ka don ia ka jingiakren kaba markhmat bad da kiwei pat ki lynti bad ki nongialam ka ULFA(I) da ka jingthmu ban wallam ia ki sha ka miej jong ka jingiakren.
