Guwahati, K’lyngkot 23: U Myntri Rangbah (CM) ka Assam u Himanta Biswa Sarma hynne ka sngi u la ong ba shen yn sdang ia ka jingkhynra ban khanglad halor ka kam pyniathoh shongkurim khynnah ha ka jylla.
Haba kren sha ki lad pathai khubor hynne ka sngi ha Guwahati, u Himanta Biswa Sarma u la ong, “Ka jingkhynra ban tehlakam ia ka kam shongkha khynnah hapoh ka jylla baroh kawei kan sa sdang shen.Ngi la shim ia ka rai ban thung ia ki ophisar ki ban khmih halor ki sienjam ban tehlakam ia ka kam shongkha khynnah.Ki la don haduh kumba shi lak tylli ki case kiba iadei bad ka kam shongkha khynnah hapoh Assam.”
“Ha ka jingialang jong ka kynhun myntri jong ngi, ngi la shim ia ka rai ban sdang ia ka jingkhynra halor ka kam shongkha khynnah.Halor kane ka bynta la dep lypa ban ai ka jingbthah sha ki bor pulit ka Assam ban pynngat ia kito kiba donkti hapoh ki kyndon jong ka POSCO Act.Kane ka kam pyniathoh shongkurim khynnah ka kham jur ha ki 10 tylli ki district ka Assam.Naduh mynta, ngin pyrkhing tyngeh ha kaba iadei bad ka kam pyniathoh shongkurim khynnah,” pyntip u Sarma.
Nalor kata u la ong ruh; “Ngi la ioh jingtip ba hapoh Assam ka don kawei ka khynnah kaba dang khyndai snem rta kaba la kylla long ka longkmie.Kito kiba kyrshan ia ka kam iathoh shongkurim khynnah ruh kin ngat lang hapoh kine ki kyndon ain.”
“Katkum ka sorbe ki la don haduh kumba 16 tylli ki kam pyniathoh shongkurim khynnah hapoh Dima Hasao district. Ha Dibrugarh ki la don kumba 23% kiba kum kine ki case.Yn leh da kaba tyngeh ha baroh ki bynta jong ka Assam,” ong shuh shuh u CM Sarma.
Shuh shuh u Sarma u la ong ba ka Karnataka ka dei ka jylla kaba nyngkong eh ka ban thung ia ki ophisar ki ban khanglad ha kaba iadei bad ka kam pyniathoh shongkurim dang khynnah.Kane ka jylla ka la pynngat haduh kumba 10,000 ngut ki shijur bad khanglad haduh 11,000 tylli ki case pyniathoh shongkurim khynnah. “Ngi la ioh mynsiem na ka sorkar Karnataka bad shim ia ka rai ban thung ia kine ki ophisar na ka bynta ban khanglad ia kiba kum kine ki kam beain.
