Shillong, K’Lyngkot 23: Ka seng Indian National Congress (INC) Meghalaya hynne ka sngi kala pynbna sa 3 ngut ki kyrtong ki ban iakhun ba kane ka ilekshon 2023.
Lah ban kdew ba hynne ka step u president ka National Congress Party (NCP) u Saleng A Sangma ula aiti iaka shithi iehnoh kam kum u MLA ka Gambegre konstitwensi ha u Commissioner bad Secretary ka Meghalaya Legislative Assembly u bah Andrew Simon.
Kane ka jingiasoh noh u Saleng bad ki nongbud jong u shaka Congress ka pynpaw ba ka Party NCP kam don nongialam shuh hapoh Meghalaya.
Kine ki kyrtong ki kynthup u president barim ka seng Nationalist Congress Party (NCP) u Saleng Sangma u ban iakhun na Gambegre konstitwensi, u MDC ka JHADC naka United Democratic Party (UDP) u bah Richard Sing Lyngdoh un iakhun na Raliang bad u Chireng Peter R Marak un iakhun na Kharkutta konstitwensi.
Haba kren sha ki lad pathai khubor u Saleng ula ong ba ka jingmih jong u naka NCP kadei namar ki nongialam ka Party ha Delhi kim don jingkitkhlieh ban trei naka bynta ka bha ka miat ki paidbah ka Meghalaya.
U Saleng ula ong ba ka jingiasoh jong u sha ka Congress kadei namar u iohi ba kadei ka Party kaba heh tam hapoh ka ri bad ka jylla Meghalaya baroh kawei bad kan dei ruh ka lad naka bynta ban nang bteng iaki kam shakri paidbah lyngba kane ka rynsan.
“La bun bun sien nga la pyrshang ban iakren bad ki nongialam ka Party NCP na Delhi kumno ban kyntiew iaka Party naka bynta ban nang lah shuh shuh ban shakri iaki paidbah ha Meghalaya hynrei haduh mynta ka Party kam shim khia halor kane bad dei namar kane, mynta ka sng, nga la shim iaka rai ban iasoh noh bad ka Congress ban bteng iaka kam shakri paidbah” la ong Saleng.
U Saleng ula kam ruh ba ula pyrshang ban pyniasoh ialade shaka Bharatiya Janata Party (BJP) hynrei kum u riewngeit Kristan u sngew ba kam iahap ia u ban pyniasoh bad kano kano ka Party kaba shah kynnoh leh bein ne ibein iaki para riew ngeit Kristan hapoh Meghalaya bad ka ri India baroh kawei.
Ula ong ba kane ka jingiasoh jong u bad ka Congress kadei ruh kum shi bynta ban nang pynkhlain shuh shuh iaka Congress hapoh rilum Garo namar baroh ki nongialam bad ki nongbud jong u kila mih lut naka NCP ban ia don bynta bad ka Congress lem bad kiwei ki Party hapoh Meghalaya.
Naka liang u kyrtong ka Raliang konstitwensi u bah Richard Sing Lyngdoh ula ong ba ka jingpyniasoh jong u shaka Congress naka UDP kadei namar u iohi iaka jinglah ka Party ban trei naka bynta u paidbah ha ka jingialam u President ka Meghalaya Pradesh Congress Committee (MPCC) u bah Vincent Pala.
U bah Richard ula ong ba kane ka sngi iasoh jong u shaka Congress kan nang ai mynsiem ia u ban nang lah shuh shuh ban trei naka bynta ka jingbha ki paidbah ka thain Raliang konstitwensi namar ka Congress ka kwah ban wanrah jingkylla ha ka synshar khaddar hadien kane ka ilekshon 2023.
“Lada ka Congress ka ioh ban thaw sorkar mynta u snem, ka sorkar ruh kan dei naka bynta jong ki paidbah baroh” la ong u bah Richard.
