Nongpoh, K’lyngkot 23: Ka Ophis u District Election Officer (DEO) ka Ri-Bhoi kala pynkhlain ia ka jingpeit pyrman mynta ha baroh ki san tylli ki Constituency ka Ri-Bhoi, ban pynthikna ia ka elekshon kaba khuid bad kaba lait na kino kino ki jingthmu ba sniew kiba lah ban pynbiej ia ki nongthep vote.
Haba kren bad ki Nongthoh Khubor, u Deputy Commissioner Arpit Uphadhayaya uba dei ruh u DEO, u la pyntip, ba kane ka ophis hadien ka jingpynbna jong ka Election Commission of India ia ka snhi thep vote bad pynjari ruh ia ka Model Code of Conduct, ka ophis ruh ka la shimkhia ban peit pyrman ia kine baroh da ka jingiatreishitom lang ki Sector Officer, ki Majistor bad ki Returning Officers.
U DEO u pyntip tuh ba ka ophis ka la pynlong ia ki jingai jinghikai bapher bapher na ka bynta ki BLO’s bad ruh ka jingiakynduh bad ki nongialam jong ki seng sain hima bapher bapher ban pan ia ka jingiatreilang kumno ban pynlong ia kane ka ileksion kaba khuid kaba suba bad kaba iaid beit.
“Ha kane ka ileksion MLA kaba mynta u snem, ngi la nang pynjanai ia ka rukom thep vote ban pynsuk ia ki riew tymmen bad kito kiba don ki jingduna ha ki dkhot met khnang ba kin lah ban pyndep ia la ka kamram ne ban pyndonkam ia la ka hok ban ioh ban thep vote bad ban jied ia la ki nongmihkhmat. Ngi la ai jinghikai kyrpang ruh ia ki BLO’s ban pynioh ia ka lad thep vote ia kum kine ki riew paidbah”, ong u DC haba pyntip ba kine ki briew ki lah ban thep vote lyngba Special Postal Ballot lada kim lah ban leit thep ia ki vote jong ki sha ki Polling Station.
Shuh shuh ruh, u la iathuh, ba ha kane ka ileksion, kin don kumba 4 tylli ki district hapoh Assam kiba la ju shimbynta ha ka ileksion MLA lyngba ka Ri Bhoi District bad mynta ki dang don hapdeng ka jingpynbeit pud hapdeng kine ki ar jylla, kumta la pyntikna ba ia ki paidbah jong kine ki 4 tylli ki district yn ailad ban shimbynta ha kane ka ileksion kumba ju long mynshwa bad na ka liang ki Deputy Commissioner bad Superintendent of Police jong kitei ki district ki la dep ban ai ka jingkular ban iatreilang ha ka ban lah pyniaid beit ia kane ka ileksion MLA ha ka jylla Meghalaya.
