Shillong, K’lyngkot 22 : Ki Pulit ka Ri-Bhoi kila ioh ban kurup ia 5 tylli ki ksiar biskit ba shongdor haduh T.30 lak na ri-Bhoi District.
Ia kane ka ksiar la ioh ban kurup na ka thain Umsning kum shibynta na ka jingpyntreikam ia ka Model Code of Conduct (MCC).
Ki Pulit kila ioh ban kurup ia kane ka ksiar na kawei ka kali Alto rong grey 800 VXI ba don u nombor AS01-DT-6749 jong u Sadihul Islam, ong u Bah Frederick Kharkangor, Chief Election Officer (CEO) ka Jylla.
Ia kane la ksiar la thew da u Bah Binsing Kharphuli jong ka dukan B Kharphuli Jeweller ha ka jingiadon ryngkat ki Magistrate (Assistant Returning Officer- Elections) bad ki sakhi shimet. Ka jingkhia jongkane ka ksiar ka long jadij 570 gram bad shongdor haduh T. 30 lak.
Hadien ka jingthew, ki Pulit kila kurup noh ia kane ka ksiar hakhmat u ARO bad la ring video ruh ia ka ha ka jingiadon ryngkat u Addl SP ka Ri-Bhoi bad ki nongsakhi. Ia kane ka ksiar la buh ha Malkhana na ka bynta ban tohkit bniah bad ban shim rai da ka Ophis u DEO ka Ri-Bhoi District.
Hynnin ka miet, ki Pulit ka Ri-Bhoi kila pynlong ruh ia ka jingkhynra ha Nongpoh, Wahlakhar, Rajabagan, Mawhati, Byrnihat, Kyrdeng, Umiam Pilangkata, Patharkhmah bad ki thain Baridua bad ioh ban kurup ia ka kyiad ba 9.915 literlem bad ka kyiad pyrsi ba 81.5 liter.
Ki Pulit ka South West Khasi Hlls ruh kila ioh ban kurup haduh 105 liter ka kyiad hynne ka sngi U Blei na Gomaghat.
