Shillong, K’lyngkot 20 : U Lamphang barim ka Iingdorbar Thaw Ain bad ruh u CEM barim ka KHADC Bah Bindo M Lanong, ula pynkha ia ka United Democratic Party-Orginal (UDP-O) ban mih aireng kum u kyrtong ha ka elekshon MLA-2023 na Nongkrem Constituency.
U Bah Bindo uba dei uwei na ki Nongseng jong ka United Democratic Party (UDP) ha u snem 1997, ula shah pynduh ticket ha ki Nongialam ka Party, kiba la ai pynban ia ka ticket sha u Bah Lambor Malngiang uba dang shu wan iasoh thymmai hadien ka jingiehnoh ia ka kam MLA.
Haba iakynduh bad ki lad pathai khubor, u Bah Bindo ula pynbna ba un mih aireng kum u kyrtong ha kane ka elekshon MLA ban wan kum u Kyrtong shimet na ka seng UDP-O.
Hynrei ula ong pat ba un nym iaid satia la ka jong ka lynti bad ka UDP namar ka UDP-O ka dei tang ka shnat jong kane ka party. U ong ba un mih madan ban iakhun pyrshah kat kaba don pyrshah ia ka UDP bad hadien bala dep ka elekshon, un sa leit phai biang sha ka UDP.
“Mar syn kut ka elekshon, ngan sa rai ban leit iatylli biang ia ka UDP-O jong nga bad ka UDP. Ngan leit phai biang sha ka sengkmie lajong, kan kham suk ia nga namar ar-lai ngut ki Nongialam kiba pyrshah ia nga kila don shabar” ula ong.
Haba kylli, u Bah Bindo ula pyntip ba um don satia ia kano kano ka jingthmu ban pynkha ia ka seng sain pyrthei ba thymmai ha Jylla.
