Agartala, K’lyngkot 19 :U heh ka AICC uba khmih ia ka Tripura u Dr Ajay Kumar u la ngat ha ka jingmynsaw hadien ba ula shah thombor ha ki briew ia kiba la kynnoh ba ki dei ki nongtrei jong ka party synshar Bharatiya Janata Party (BJP) ha ka 18 tarik mynta u bnai.
Kham hashwa, kata ha ka 13 tarik mynta u bnai u heh ka All India Congress Committee uba dei khmih ia ka Tripura u Ajoy Kumar, u Convener ka Left Front u Narayan Kar bad u state committee secretary ka CPIM u Jitendra Choudhury ki la pynlong ia ka jingialang hapoh ka ophis treikam jong ka CPI-M ha ka jylla.
Hadien ba ki la mih na katei ka jingialang, u heh ka AICC u Ajoy Kumar u la ong; “Nga la wan hangne ban iakynduh iala u jong u hymmen bad ngi la rai ban iatreilang. Ka BJP kam shym la lah ban pynurlong wat tang kawei ruh ka jingkular kaba ka la kulur ha ka por jong ka ilekshon ba la dep ha u 2018.Kumba kalong mynta hi kane kam dei satia ka sorkar hynrei ka kynhun runar kaba pyniaid ia ka jylla.Ki la thombor ia ki jingwah jingsat (hoardings) bad ia ki ophis jong kiwei pat ki party.Na ka liang ki paidbah kila dawa ban wan lang ha kawei ka rynsan.Dei na kane ka daw ka Congress bad ka Left Front kila wan ryngkat lang ban iakhun ha kane ka ilekshon.”
Nalor kata u la ong ruh ba la thaw ia ka committee na ka bynta ban pynlong ka jingiakren halor ka jingiabhah ia ki seat na ka bynta kane ka ilekshon assembly ka ban wan.
