Shillong, K’kyngkot 18 : Ka Tnad Election ka Jylla kala ithuh haduh 34 tylli ki Constituency kiba suba jur ba ki lah ban mih ka huri hura ha ka elekshon MLA-2023 namar ka jingjur ka jingpyndonkam ia ka pisa.
Ia kane la pyntip da u Chief Election Officer (CEO) ka Jylla Bah Frederick Kharkongor haba iakren bad ki nongthoh khubor ban pyntip ia ka jingpynbna jong ka Election Commission of India (ECI) ia ki tarik ban pynlong ia ka elekshon hapoh ka Jylla.
Kat kum ka jingong jong u, ki Expenditure Observer bala phah da ka ECI kin pynleit jingmut bha ha kine ki 34 tylli ki Constituency.
“Kumba long mynta la dep ban ithuh ia ki 747 tylli ki polling station kum kiba lah ban mih ka huri hura bad 399 tylli kiba don ka jingma hynrei kine ki lah ban kylla kat nang jan ka elekshon” ula ong.
U Bah Kharkongor ula iathuh ba ha kane ka elekshon MLA kaba mynta kin don baroh 3482 tylli ki jaka thep vote haki 60 tylli ki Constituency bad kin don ruh ki jaka thep vote ia kaba yn pyniaid bad peitngor da ki kynthei.
Ula ong, ha kane ka elekshon mynta ka kynti yn ailad ruh ia ki riewtymmen kiba la palat 80 snem ka rta ba kin pyndonkam da ka Form 12D ha kaban ioh thep vote na iing.
U Bah Kharkongor ula pyntip ba ka jylla kala ioh pdiang ia 12 pyrton ki bor pahara ban pynthikna baka jingpynlong iaka elekshon kan long kaba khuid ba suba bad kaba iaid beit iaid ryntih haka jylla.
Ka ECI kala pynbna ba ka sngi thep vote ha kane ka elekshon MLA-2023 ha Jylla kan long ha ka 27 tarik Rymphang bad ka jingianiew ia ki vote kan long ha ka 2 tarik u Lber.
U CEO u pyntip ba da kane ka jingpynbna jong ka ECI ia ki tarik elekshon,ka Model Code of Conduct kala treikam ha Jylla baroh kawei.
U CEO ula pyntip ba la mana pyrshah ban pyndonkam iaki kali sorkar da kino kino ki seng sain pyrthei, ki kyrtong kiba iakhun elekshon ne ki briew kiba don bynta bad ka kam elekshon. Ula ong ba ki MyntriSsorkar ki lah ban pyndonkam iaka kali sorkar haba ki leit sha ki ophis treikam hynrei kin ym lah pat ban pyndonkam da ki kali sorkar ha ki kam elekshon bad ka MCC ka mana jur ia kane.
Ula ong, kito kiba hap ha ka kyrdan Z Category ne kito kiba ioh jingiada na ki pulit kin bteng ban ioh iaka jingida hynrei kim dei pat ban pyndonkam bakla na ka bynta ka kam ialap elekshon bad ka tnad kam pohiing kala don lypa iaka thup kyrteng jong kito kiba ioh jingiada namar ka jingdon ka jingma iaka jingim ka jongki.
U CEO ula ong, ki jingtrei ia kino kino ki projek kiba thymmai kin ym lah ban sdang shuh hynrei yn shah ban iaid shakhmat tang ia ki jingtrei kiba ladep ban sdang hashwa ban pynbna iaka tarik elekshon.
U CEO ula ong, ki seng sain pyrthei kiba tah ia ki poster ne wah ia kino kino ki jingthoh kin hap ban weng noh ia ki baroh hapoh 48 kynta hadien ba kala don ka jingpynbna iaka tarik elekshon bad ba la pyntreikam iaka Model Code of Conduct.
Ula iathuh ba ki kyrtong kiba iakhun iaka elekshon kin ioh ban pynlut pynsep haduh 28 lak tyngka ha ka jingiakhun elekshon MLA bad ka tnad Election kan pynjur iaka jingpeitngor ha kaba iadei bad ka jingpyndonkam iaka pisa ha ka por elekshon bad kan shim ruh ia ki lad ki lynti ban khmih bniah ruh iaka jingphah pisa lyngba ki kor Digital kum ka Google Pay bad kiwei kiwei.
