Shillong, K’lyngkot 18 : Ka National People’s Party (NPP) kala kyntu ia ki paid nongshongshnong ka Jylla ba kim dei ban ngop ha ki jingkular ka All India Trinamool Congress (AITC) bad ong ba ki jingkular jong ka Chairperson ka AITC Mamata Banerjee ha ka jingialang elekshon ha North Garo Hills, ka dei tang ka jingkular elekshon, kaba sngew biang tang ha ka jingthoh bad ha ki jingpynbna paidbah.
Ka NPP ka ong “Ka (AITC) kala niew ia ka baaki (credit) card- ‘WE Card’ bad ‘MYE’ kum ka kam ba khraw khlem da sngewthuh ba kum kine ki kam, lada lah ban leh, kan ialam ia ka Jylla sha ka jingkitram, kumba la jia ha West Bengal”.
Ka NPP ka ong ba ka WE Card scheme ka dei kaba shu pynkylla kyrteng na ka skhim Lakshmir Bhandar jong ka Sorkar West Bengal. “Ka Sorkar AITC ka West Bengal kala kit ia ka ram ba kot haduh T. 59,000 shikhlieh (per capita debt) ha u snem 2022-2023 bad kane ka skhim ka dei kawei na ki daw ba nang kiew ka jingkitram”.
“Ka long kaei kaei ka bym sngewphylla shuh, ka Sorkar Bengal kala kit ram haduh T. 80000-T.90000 klur ryngkat ka sut ha ki nongpan ram manla u snem. Manla ki Nongshongshnong ka Bengal kin hap ban siew ia ka ram ba kot T.8000 manla u snem” ong ka NPP.
Ka ram ba nang kynton jong ka West Bengal na ka bynta u snem 2022-2023, la khmih ba kan kiew sha ka T. 5.86 lak klur naka T. 5.28 lak klur kat haduh ka 31 tarik Lber, 2022, ong ka NPP haba pynpaw ba ka Sorkar Weng Bengal kala iaksaid mynta bad ka jingkyrduh pisa bad shem jingeh ban nang pyniaid ia ki Social Scheme bad kane ka skhim (Lakshmir Bhandar) kala nang ktah ia kiwei kiwei ki skhim ruh.
“Haba iohi ia kine ki jingkitram kitshah, la paw shai b aka AITC kan sa pynlong ruh ia ka Meghalaya ban ngat lang ha ka shrip kitram bad ieh ia ki briew ba kin mad ia ki jingtynjuh” kala ong.
Ka NPP kan ai nym ailad satia ia ka AITC ba kan pynbiej ia ki paidbah da kine ki jingkular thok. “Ngin thad madan ia ki kat kaba don” ong ka NPP haba pynpaw “Kam long ruh kaba shai ba nangno ka AITC kan wanrah ia ka pisa ban pyntrei ia kane ka skhim lane hato kan rah ia ka pisa ka Meghalaya sha West Bengal.
Ka NPP kala ong ruh ba ka rukom pynrung kyrteng ha kane ka skhim AITC ruh ka dei kaba bun ki jingduna bad ka I-PAC kum ka agent ba mareh ha kylleng ki jaka ka Jylla ban pynrung kyrteng ia ki briew, lyngba ki kor software (automated bots), ka jingpynrung kyrteng ka dei kaba shu pynheh. Kine ki skhim kin kot ka jingpynlut haduh T. 2000 klur naka pla tyngka, kaba long 5 % na ka jingmang pynlut ka Jylla, kaban lam sha ka jingkyrduh pisa ha ki kam pynroi, ka jingsam marbam bad jingsiew tulop ia ki nongtrei sorkar.
“Mynta ka AITC ka kwah ban die ia ki jingphohsniew sha ki nongshongshnong ka Jylla haba u Nongialam jong ki Dr Mukul Sangma um shym la lah ban leh eiei ha ka por jong u kum u Myntri Rangbah” ong ka NPP.
Haba kren halor ka jingbym iohkam iohjam bad ki briew ba khlem kam ha West Bengal, ka NPP kala ong ba ka West Bengal ka dei kaba wan ba-ar ha ka jingdon bun eh ki Kynthei kiba wadkam kat kum ka samari jong ka Employment Exchange 2020, kaba long palat 24.6 lak ngut ka jingdon jong ki Kynthei ha Meghalaya. Ka ong ba kat kum ka samari jong ka Employment Exchange, ka jingdon bun eh ki nongwad kam ha ka Live register hapdeng u snem 2019, ka dei ka West Bengal (77.6 lak).
Ka NPP ka ong ba ka Sorkar West Bengal kala kam ba kila pynkha haduh 10 million ki kam ban aikam ia ki nongshong shnong hynrei haduh mynta, ka Employment Exchange jong kane ka Jylla ka pyni ba ki don jan 3.5 million ki nongwadkam kiba la pynrung kyrteng ialade.
Haba pynpaw ba ka skhim jong ka Sorkar ba ialam da ka NPP ka iapher bak ly bak bad kine ki skhim ka AITC, ka NPP kala ong “Ka Sorkar ba ialam ka NPP kala wanrah ia ki kam pynroi kiba paw ha ka Jylla bad kala wanrah ia ki policy bad ki programme ban nang ialam ia ka Jylla Meghalaya sha ka jingkiew shaphrang.
Haba kdew ba ka NPP ha kine ki san snem kala pyni ia ki jingtreikam kiba paka bha da kaba wanrah ia ka FOCUS bad FOCUS+ kaba iarap ia ki Nongrep, ka NPP “Kine ki skhim kila treikam bad ki paidbah nongrep kiba la kot palat 4.5 lak ngut kila ioh jingmyntoi na ki. Ka ong ruh ba ki Longiing jong ki Nongrep kila ioh bad ka song pisa ba T. 10000 na kine ki skhim.
Ka NPP kala kdew ruh ia ka Youth Empowerment through Youth Empowered Organization (YESS) Meghalaya kaba dei naka bynta ki samla ha kaba ka Sorkar kala ai ia ka song jingiarap ba kot haduh T. 1 lak sha ki seng jong ki samla ba kin kyntiew ia ka jingim ki samla.
