Shillong, K’lyngkot 18 : Ka Chairperson ka All India Trinamool Congress (AITC) Mamata Banerjee hynne ka sngi balang kala ong ba tang ka party jong ka, kaba lah ban ai ia ka Sorkar kaba shakri bha ia ki paidbah ka Jylla Meghalaya.
Ka Banerjee ha ka jingleit iuhkjat ha North Garo Hills, la pdiang sangewbha da ki hajar ngut ki briew kiba la ialum paidbah ha madan Dilma Apal, Mendipathar.
Ka Banerjee kala ong “Nga wan hangne ban iathuh ha phi ba ka TMC ka dei ka Party kaba tang ma ka, kaba lah ban ai ia ka sorkar kaba shakri bha bad iarap ban pynrulong ia ka jingphohsniew ki samla, ki samla pule bad ki Kynthei. Nga ai ha ki Kynthei ia ka Lakshmir Bhandaar. Hangne, ngan ai T.1000 sha ka Kynthei jong kawei pa kawei ka Longiing”.
Ha ka jingwan iuhkjat jong ka ha Jylla ha u bnai Nohprah, ka Chairperson ka AITC kala pyllait paidbah ia ka WE Card Scheme ba kular ban ai song jingiarap pisa sha ki kynthei ka Jylla Meghalaya kum ka jingpynkupbor ia ki. Kane ka skhim kala ioh ia ka jingpynrung kyrteng palat 3.50 lak ngut haduh mynta.
Haba jer ia ki jingbym lah treikam jong ka Sorkar MDA, ka Mamata kala ong “Kaei kaba ka Sorkar kala leh ha kine ki san snem? Nga kob ia ki ban pyni ia ka report card ia kaei kaba kila leh ha kine ki san snem. Balei la bun tylli ki kam, ka bording kam shym la poi ha Meghalaya. Balei ba ki samla kim ioh ia ki lad iohkam iohjam”.
Haba kdew ia ka jingaiti jong ka Meghalaya TMC ia ka Jylla, ka Mamata kala kyrpad ia ki paidbah “ban pynkup ia ki briew, bat ia ka deiriti, lehkmen ia ka jinglong kyrpang ka Meghalaya”.
Haba ai khublei ia ki paidbah halor ka jingshaniah ia ka jingiohi jngai jong ka Meghalaya TMC, u National General Secretary ka AITC ula ong “Haba peit ia ka jingieid, ka jingiaroh, bad ka jingthang jong ki paidbah, nga lah ban ong ba ka NPP kan nymioh jingjop wat tang shi seat na Ri-lum Garo”.
U Abhishek ula ong ba lada ka AITC ka shah jied ban ioh bat ia ka bor synshar, ki paidbah ka Jylla kin pyniaid ia ka Sorkar ha Meghalaya, ym kum kito ki nongialam kila pyniaid ia ka Sorkar na ki Iingpaki dulan na Guwahati bad Delhi.
Ki Nongialam ka AITC kila kular ba ka Sorkar ban wan ha Jylla kan dei “jong ki paidbah ka Meghalaya, da ki paidbah ka Meghalaya bad na ka bynta ki paidbah ka Meghalaya”.
