Shillong, K’lyngkot 18 : Ki Pulit ka Nongstoin Police Station, hynnin ka sngi ba-ar, kila kem ia 4 ngut ki briew kiba suba jur ba ki dei ki nongtuh masi hadien ka jingshah bat ha ki VDP bad ki Nongshongshnong ka Domkohmen.
Ia kine ki briew la ioh ban bat da ki VDP ka Domkohmen ha ka step phyrngap jong ka 16 tarik por 1 baje eiei namar ka jingdonkti ha ka kam tuh masi.
Ki Pulit kiba leit tohkit ia kane, kila shimti ia kine ki briew bad la wan ialam sha Police Station ban pynlong ia ka jingtohkit kaba biah.
La pyntip ba u Rangbah Shnong ka Domkohmen ula ujor da ka ejahar pyrshah ia kine ki briew, kiba la shah pynngat mynta ha ka kyndon 379/34 jong ka IPC.
Kine ki 4 ngut ki briew ki kyrteng u Francis Pariong ba na shnong Tinniang, West Khasi Hills, u Rishanstar Marngar ba na shnong Tiehrit, West Khasi Hills, u Shanborlang Phyllut na ka shnong Mawrang, Rambrai, West Khasi Hills bad u Aiswel Nongrum ba na Umthlieh bad Mawlyndep, Ri-Bhoi.
Ki Pulit kila rah tian bishar ia kine ki briew hakhmat ka Iingkashari ha West Khasi Hills ryngkat ka jingkyrpad ban set ia ki hapoh ka Judicial Custody khnang ba u Investigation Officer (IO) un lah ban pyndep ia ka jingtohkit.
