Shillong, Kyllalyngkot 17: U Chairman ka Congress Election Screening Committee uba long ruh u MP ka Lok Sabha Gaurav Gogoi, hynne ka sngi ba-ar, ryngkat bad ki nongialam ka seng Congress kala lum iaka jingialang bad ki kyrtong kiba pan tiket naka seng Congress ban iakhun iaka elekshon ban wan.
Ia u Gogoi la wan ban synran lang da u MP Rajya Sabha na Rajasthan Neeraj Dangi bad u MP Lok Sabha na Kerala Hibi Eden, ha kaba la iadonlang u President ka Meghalaya Pradesh Congress Committee Bah Vincent Pala bad u Nongaiktien ka MPCC Bah Ronnie V Lyngdoh.
U Gogoi ula ong, ba ka jingwan ka jong ki heh ka AICC ka long ban iakynduh ia ki kyrtong kiba pan tiket naka Congress ban iakhun iaka elekshon MLA 2023 bad ban sngewthuh iaka jinglong jingman bad ka jingpynkhreh kitei ki kyrtong iaka elekshon.
“Ngi donkam ban tip ia kaei ka jingkhlain jong ka seng, kaei ka jingsngew jong ki paidbah, kaei kaba ki kyrtong ki pyrkhat bad ha kano ka dur ka AICC kan iarap ia ki bad iaka jingialap elekshon” ong u Gogoi.
Ula pynpaw iaka jingkyrmen ba iaka jubab kaba ai da ki kyrtong kiba pan tiket ka pawshai ba kila long kiba la pynkhreh ban iakhun iaka elekshon.
