Shillong, K’lyngkot 17: Ka Prime Meghalaya ha ka jingiatreilang bad kynhun tem ka Summersalt hynne ka sngi ka la pyllait ïa ka jingrwai ba la ai kyrteng ‘I have a dream’ kum shi bynta ban pynshlur iaki samla ban sengkam lajong.
Haba kren sha ki lad pathai khubor u nongrwai ka kynhun Summersalt u bah Kit Shangpliang ula ong ba ka jingmut jong kane ka jingrwai ka long ban ai mynsiem bad ban pynshlur ïa ki samla khamtam ïa kito ki briew kiba seng la ka kam lajong ban nym kynran dien naka bynta ban lah ban ieng hala ki jong ki kjat.
U bah Kit ula iathuh ka Prime Meghalaya ka la ïarap ïa ki khun samla ban kyntiew ïa ki ha ki liang baroh bad kum ka kynhun tem ka kwah ban iohi shibun ngut ki samla kin lah ban ieng hala ki jong ki kjat.
Naka liang u director ka Meghalaya Basin Development Authority (MBDA) u bah Aiban Swer ula ong ba katba nang ïaid ki sngi ki por ki khun samla jong ka jylla ki la leit ban wad kam wad jam sha kiwei pat ki jylla bad ki ïoh ka kam kaba rit kaba ria ka jingioh kaba rit bad teng teng ki wanphai noh.
U bah Aiban ula iathuh ba ka PRIME ka la ïateh bad ka IIM Kolkata ban ai jinghikai ïaki briew ba kumno ban pyntbit ha ki kam khaii jong ki bad ka PRIME kala ki jied ïa ki briew kiba dei ki nongtrei, ki nongpynmih, ki nongshna, kiba thaiñ ïa kano kano ka mar ba ki leh bad wanrah ïa ki shakhmat bad hadien pat la jied ïa ki ban long ki nongioh bynta.
