Shillong, Kyllalyngkot 16: U National President ka NPP bad Myntri Rangbah ka Jylla Conrad K Sangma hynne ka sngi nyngkong, ula pyntip ba bun ki briew kila pynpaw ba ka ‘WE Card’ bad ka ‘MYE Card’ jong ka TMC kadei tang ka Card Baki ne Card shim lypa bad ai hadien.
“Ka TMC kala kular bad bun ki briew ha ka thaiñ nongkyndong kiba la dep ban shim iaka card bad dep rejistar, kila ong ba kadei ka Card shim lypa bad ai hadien (baki), kumta kadei tang ka jingkular” ong u Conrad haba iakren bad ki lad pathai khubor.
“Baroh ki seng saiñ pyrthei ki don iaka hok ban ai iaki jingkular hynrei kane ka sorkar jong ngi (MDA) kam shym kular hynrei ka pyni beit da ka kam” ula bynrap.
U Conrad ula ong “Ngi la trei iaka kam jong ngi, ngi la ai jingkyrshan ia ki nongrep, ia ki Self Help Group jong ki Kynthei bad ia ki kynhun bapher jong ki samla bad wat hashwa ba ngin ai ka jingkular ne wat hashwa ba ngin kren eiei” ong u Myntri Rangbah ka jylla.
Ula ong, ka sorkar jylla kala pyni da ki kam bad kala kren da kaba shai kdar bad kaei kaba ka sorkar ka leh kam dei satia ka Card Sahram hynrei kadei kaba shisha kaba la jia ha kylleng ki jaka bad kumta ka FOCUS bad ka FOCUS Plus kidei kiba jia shisha, ha kaba palat 3 lak ngut ki nongrep kila ioh jingmyntoi naka FOCUS bad FOCUS Plus.
Halor ka jingkynnoh pyrshah ka BJP ia kitei ki skhim, u Mynti Rangbah ula ong, ba ia kitei ki skhim la sdang ha u bnai Lber 2021 kaba la jan dap 2 snem bad lada kadei namar ka jingthmu ha ka por elekshon, ka sorkar kala dei ban sdang ia katei ka skhim ha kine ki khyndiat bnai.
“Kitei ki prokram kila iaid mynta la jan 2 snem, kumta ki lah ban ong kat kum ka jingsngewbit ka jongki, hynrei na ka liang ka jong ngi, ngi sngew ba katei ka prokram kadei kaba kongsan bha na ka bynta ban wanrah iaka jingkylla ha ka ioh ka kot ha ki shnong ki thaw” ong u Conrad.
Ula ong katei ka prokram ka dei da ka jingthmu ban pynpoi sha kiba duk tam ha ka imlang sahlang bad kitei kidei ki kynhun, ki lah ban dei ki Producer Group, nongrep, ki briew kiba thaiñ jingthaiñ, kiba shna iaki tiar ki tar, ne ka kynhun jong ki samla kiba pynmih iaki soh ki pai haka Food Processing.
“Kumta kano kano ka kynhun kaba pynmih ia kino kino ki mar ka lah ban ioh ia katei ka jingkyrshan bad ka jingthmu ban leh ia katei kadei ban ai jingkyrshan ia ki kynhun bad ia ki riewshimet. Haba ngi mutdur lada ka don ka kynhun jong ki 20 ngut ki briew bad ki ioh T.1 lak man la u snem haka Account jong ka kynhun bad T.1 lak haka account shimet, kumta ki ioh T.2 lak man la u snem” ong u Conrad.
