Dibrugarh, K’lyngkot 16 :Ki paidbah nongshong shnong ha ki bynta jong ka Sasanpara PWD colony ka Dibrugarh, Assam hynne ka step 16 tarik kila her syrngiew hadien ba ki la don ki nongiaid lynti kiba la lapdien ia ka khlieh jong i khunlung iba dang shu kha.
Ki nongiaid lynti kiba dang iai lyngba ia katei ka jaka ha ka por kumba 6 baje mynstep ki la pyntip sha ki nongshong shnong bad jurip bniah lyngba ki CCTV ban lapdien na kano ka jaka kane ka shynrang khlieh ka la wan poi.
Da kaba shim ba kane ka khlieh ka dei ka jong i khunlung kynthei, ki dur lyngba ka CCTV ki pyni ruh ia u ksew surok uba wanlam ia kane ka khlieh sha kane ka jaka.Hadien kane la pyntip noh ia kane ka jingjia sha ki bor pulit kiba la wanpoi mardor sha kane ka jaka.
Ka jingwad ban lapdien ia ki bynta jong ka met jong itei i khunlung ka dang iaid shakhmat.Ha kawei pat ka bynta la pynlong ruh ia ka jingtohkit kaba bniah ban lapdien ia ki kmie ki kpa jong ine i khunlung ba la khlad noh.
Ha kawei pat ka jingjia kaba la pynher syrngiew, kiba haiing hasem jong ka Jutika Basumatary kaba la khlad noh hapoh GNRC hospital , Guwahati ki la pynpaw ka jingkyndit kaba khraw hadien ba ki la iohi da ka metiap jong uwei pat u briew hapoh ka kyrpong iing ka jong ki.Kane ka jingjia ka la jia hapoh Bhakatpara kaba hapoh Mangadai ka Darrang district.
Katkum ki khubor ia kane ka metiap la wanlam napoh ka jaka buh metiap jong ka GNRC na Amingaon, Guwahati.
Haba iakren bad ki bor ba dei khmih ka GNRC, ki la ong ba kiba haiing hasem ki la shah kyntait ban peit khatduh ia ka metiap bad dei na kane ka daw ka la mih kane ka jingbakla.Watla katta ki la ong ba ki bor pulit ki la pynlong ia ka jingtohkit halor kane ka jingjia bad ban shim ka jingpynshitom pyrshah ia ki briew kiba donkti halor kane ka jingbakla.
Nalor kata kiti ki heh ba dei khmih kila pyntip ruh ba ia ka metiap jong ka Jutika Basumatary la phah noh kham hadien ha ryngkat ki dkhot ka longiing jong ka.
Ka Jutika Basumatary kaba dei ka kurim jong u Mahiram Basumatary kiba napoh Bhakatpara ka la khlad noh hapoh Amingaon GNRC Hospital ha Guwahati ha ka por 11 baje mynmiet jong ka 17 tarik u Nohprah ba la dep.Hadien ba la wanrah ia ka metiap sha la iing ki la pynpaw ia ka jingkyndit ban lap da ka metiap jong u briew bym lah ban ithuh.
