Agartala, K’lyngkot 16 : U Shrimanta Dey uba dei u dkhot nongialam jong ka South District Secretariat Committee ka Tripura CPI(M) la kynnoh ba ula shah thombor ha ka 15 tarik mynta u bnai ha ki runar ba la kyrshan da ka BJP katba ki dang don ha ki bynta jong ka Muhuri.
Hadien ba kila wan iashim bynta ha ka prokram jong ka party, u Dey u la don ha ka lynti ban leit sha ka iingsah u paralok jong u, u Suresh Biswa hadien ba ka kynhun ki runar kila mih kynsan bad thombor ia une u nongialam ka CPI-M bad lute ruh ia ka pisa T.40,000.
Haba kren sha ki lad pathai khubor, u nongialam ka CPI(M) u Ashu Debnath u la ong ba ia u Dey la pynkynriah noh shapoh Belonia Sub-District hospital bad hadien la pynkit noh sha Agartala GB hospital namar ka jingjur jong ka jingmynsaw.
Lah ban kdew ba ki kam iaumsnam sain hima hapoh Tripura kila nang jur naduh kine ki khyndiat sngi ba la dep, kata wat hadien ki sienjam ba la shim da ka Election Commission ban khanglad ia ki jingiakynad shwa ka jingpynlong ia ka ilekshon assembly ha kane ka jylla.
Na ka liang ka CPI(M) state secretariat ka la pynrem jur ia kane ka kam thombor bad dawa ban kem mardor ia ki runar kiba donkti.Halor kane ka ujor ruh da ka FIR sha ki bor pulit ha ryngkat ki kyrteng jong ki nong thombor.Hynrei wat hadien kane ka jingujor na ka liang ki pulit kim shym la shim ia ki sienjam ban kem ia ki briew kiba donkti.
