Shillong, K’lyngkot 15 : U MLA ka Mawryngkneng bad Chief Whip ka Sorkar Jylla Bah Pyniaid Sing Syiem, ula ai ka jingiaroh ia u Myntri barim bad MLA ka Mylliem Bah Hamletson Dohling halor ka jingpynsangeh ia ka jingpynbna (Notification) jong ka Sorkar barim ha u snem 2015, ban pyntreikam solansar ia ka Meghalaya Building Bye-Laws ha baroh kawei ka Jylla naduh ki jaka sor haduh ki jaka nongkyndong ba hap hapoh ka Sixth Schedule.
Lah ban kdew ba ha u Nailar 2015, ka Sorkar Congress bala ialam da u Dr Mukul Sangma kum u Myntri Rangbah, kala pynmih ia ka jingpynbna ban pyntreikam ia ka Building Bye-Laws naduh ki jaka sor bad ki jaka nongkyndong ba hap hapoh ka Sixth schedule haba bthah ruh ia ka Tnad Meghalaya Energy Corporation Limited (MeECL) bad ka Tnad Public Health Engineering (PHE) ban pynduh ia ka jingtan bording ne tan umbam umdih sha ki Iing ba dang shna thymmai khlem da ioh jingbit na ka MUDA.
Kane ka jingpynbna kala pynbitar ia kiba bun balang kynthup naduh ki Sengbhalang, ki seng sain pyrthei, ki riewsain pyrthei bad ki nongshongshnong ruh kumjuh kiba la iamih sha surok ban dawa pyndam ia kane ka jingpynbna.
“Ngi sngew kitram ia u MLA Bah Hamlet halor ki artylli ki kam, kiban ai jingmyntoi ia ka constituency ka Mawryngkneng haba iadei bad ka jingpynbna (notification) bala wanrah da ka Sorkar barim lyngba ka Tnad MUDA kaba ong-baroh ki longiing kiba thmu ban tei iing kam pher la kiba heh ne barit kin hap ioh jingbit shuwa na ka MUDA” ong u Bah Pyniaid haba pynkynmaw ba kumno kane ka jingpynbna (notification) kala ktah ia kiba bun ki shnong hapoh ka constituency jong u.
Kane ka dei kawei na ki jingeh ba ki paid nongshongshnong ka Mawryngkeng, kumba long ka Mylliem Constituency, kila mad na ka jingiajan bad ka New Shillong ba kynthup ia ka Umpling, Nongrah, Mawlynrei, Itshirwat haduh Mawpdang bad Sohryngkham.
“Hadien ba u Bah Hamlet ula long MLA bad la shah jied ban long u Myntri ka Tnad pynroi sor, ka dei hapoh ka jingialam jong u, bad jingiatreilang bad ka Sorkar, la pynsangeh ia kane ka jingpynbna (notification)” ong u Bah Pyniaid.
Hadien ka elekshon 2018, kaba plie lynti ia ka Sorkar MDA ba ialam da ka NPP, ka sorkar kala mynjur ban pyndam noh ia kane ka jingpynbna u snem 2015 bad ruh ia kiwei ki jingpynbna ba hadien kiba la pyllait shisyndon ia ki Scheduled Areas kiba hap hapoh ka KHADC na ka jingtreikam jong ka MUDA Building Bye-Laws.
Kane ka rai kala mih hadien ba u Myntri Rangbah ka Jylla Conrad K Sangma ula iakynduh ia ka KHADC bad ki Khlieh Nongsynshar Shnong.
