Guwahati, K’lyngkot 14 :U commander in Chief jong ka kynhun kieng atiar Kamtapur Liberation Organisation (KLO) u Jeevan Singha ha ryngkat 9 ngut ki dkhot kieng atiar kila wan rung sha ki bynta khappud ka India napoh Myanmar, ong ka tyllong khubor.Kine ki dkhot la ong ba ki la rah ruh ryngkat ki laitylli ki tiar siat.
Ki tyllong khubor ki iathuh ba kane ka kynhun mynta ka la don ha kawei ka jaka ka bym lah ban tip thikna hajan khappud ka India bad Myanmar.La suba ba kane ka kynhun ka don mynta ha ki bynta jong ka Langwa kaba hap hapoh Mon district ka Nagaland.
Lah ban kdew hangne, ba kane ka kynhun kieng atiar Kamatapur Liberation Organisation ( KLO ) kaba dei ka kynhun kaba la shah khein beain bad kaba treikam bha ha ki thain sepngi ka Assam bad ha ki thain shatei ka Bengal bad kaba la dawa la ka jong ka jylla Kamatapur ka la pynpaw ia ka jingdon mon na ka bynta ban pynlong ia ka jingiakren iasuk bad ka sorkar.
Ha ka khubor ba la phah lyngba ka social media, kane ka seng kala pyntip ba ka jingiakren iasuk kaba dang iai bteng hapoh ka KLO bad ka sorkar India ba la lamkhmat da u Myntri Rangbahduh (PM) Narendra Modi bad u Myntri kam pohiing u Amit Shah ka la jan kut artad.Ka shithi ka la ong ruh ba yn ym don satia ki kynhun iasylla kiba napoh bad kiba na shabar ki ban lah ban pynthut ia kane ka jingiakren iasuk.
Da kaba ai khublei snem thymmai ia ki paidbah nongshong shnong, u Symbud nongialam jong ka KLO u Surya Koch u la kyntu ia ki nongshong shnong ba kin ai ka jingkyrshan ha ka jingiakren iasuk ka jong ki bad ong ruh ba ia ki jingeh kiba la neh palat 29 snem mynta shen yn sa lah ban weng noh.
Kham hashwa, kata ha u bnai Nailar 2022, u Kailash Koch uba dei u nongialam ba ar bad ba kongsan jong ka KLO ula wan ban pyndem noh ia lade hakhmat ki pulit ha Calcutta. Nalor une u general secretary ka KLO, ka kurim jong u ruh ka Jugli kala wan ban pyndem ryngkat lang.U Koch ula aiti noh ia kawei ka suloi AK-47 sha u director general of police u Manoj Malaviya ha Bhabani Bhaban, kaba dei ka headquarter jong ka tnat pulit ha ka jylla.
