Nongpoh, Kyllalyngkot 13: Hadien ka jingsakhi ia ka jingeh jong ki khynnah skul ka thain Mawhati ha ka leit ka wan ban poi sha ki iingskul ki jong ki, mynta ka sngi da ka mynsiem kaba kylluid bad ban shakri paidbah, u Bah Shemphang Lyngdoh, u kyrtong ka party NPP ha ka ileksion ban wan na Mawhati u la leit ban aiti noh da kawei ka skul bus ia kaba la aiti sha ka Snohktilang Village Organization da kaba pynkhamti ban pyniaid bad peit ban khmih ia kane ka skul bus.
Ia kane ka skul bus kaba la aiti ban shakri ia ki khynnah pule ka thain Mawhati ka dei kaba pynmang kyrpang na ka Chief Minister Development Fund ha kaba ka Snohktilang VO ka la ioh ia ka jingpynmang ban pyniaid bad peit ia kane ka bus.
La wan ban sakhi lang ha kane ka sngi, kaban sah jingkynmaw bad ka jingkmen jong ki khynnah skul ka thain Mawhati ha kaba la aiti ia kane ka bus da u Bah James Sylliang MDC barim ka Mawhati, Bah RM Mukhim Working President ka NPP Mawhati Block, Bah Enel Wahphlang Rangbah Shnong Raitong bad kiwei kiwei ki riew rangbah jong ka thaiñ.
U Bah Shemphang Lyngdoh, kum u kyrtong ka NPP na Mawhati Konstituensi, u la pynpaw ia ka jingkmen kaba khraw ban ia donlang ha kane ka sngi sah jingkynmaw jong ki khynnah skul ka thain Mawhati, ha kaba lyngba ka skhim kyrpang ba la mang na u Myntri Rangbah ka Jylla la lah ban pynurlong ia ka jingdonkam kaba kongsan eh ban pynsuk ia ka la leit wan jong ki khynah skul lyngba kane ka skul bus kaba la ioh ban aiti sha ka Snohktilang VO.
U la pynpaw ruh, ba kum u wei na ki riew rangbah u ba la iaid sharum shaneng u la sakhi da shisha ia ki jingeh ba la mad da ki khynnah skul kane ka thain, ha kaba ki la shem shitom shikatdei eh ban poi sha ki iingskul jong ki ha ki por kiba biang bad kiba la shah ktah ruh wat ha ka bai leit bai wan man ka sngi, hynrei lyngba ka jinglah ban pynioh ia kane ka skul bus kan long shisha ka jingmyntoi na ka bynta ki khynnah skul jong ka thain Mawhati.
