Shillong, K’Lyngkot 13: Ki nongialam jong ka All India Congress Committee (AICC) hynne ka sngi ki la poi sha nongbah Shillong ban shong bishar ïa ki kyrteng jong ki kyrtong ki ban sa pynbna ha ka thup kyrteng ba ar kaba ka seng kan sa pynbna shen.
Ha kane ka jingialang la don lang u MP sha Rajya Sabha u Mukul Wasnik, u badei khmih iaka Meghalaya u Manish Chatra, u president ka Meghalaya Pradesh Congress Committee (MPCC) u bah Vincent Pala, u working president u bah Ronnie V Lyngdoh lem bad kiwei ki nongialam ka AICC bad MPCC.
Haba kren sha ki lad pathai khubor u Mukul Wasnik u la pyntip ba ka Congress ka la dep ban pynkhreh bha ban aireng ha ka ilekshon 2023 bad shen ka Party kan sa pyllait khatduh iaka thup kyrteng jong ki 45 ngut ki kyrtong.
“Ka jingwan jong ngi sha nongbah Shillong kadei naka bynta ban bishar iaki kyrteng jong ki kyrtong ba ka Party ka thmu ban pyniakhun ha kane ka ilekshon ban wan bad kumjuh ruh ban lum jingtip haba iadei bad ka jingpynkhreh iaka ilekshon” la ong u Mukul.
U Mukul ha kaba dang shen ka Meghalaya Pradesh Congress Committee (MPCC) ka la dep ban pynbna ïa ki kyrteng jong ki 45 ngut ki kyrtong bad ka la dep ruh ban phah ruh ïa ki kyrteng ki ba dang sah, kiba ka seng kan sa pynbna.
U la ong naka liang ka party ka don ka thong ban pynieng lut na baroh 60 tylli ki konstitwensi bad shen naka liang ka Party kan sa pyllait shuh shuh iaka thup kyrteng jong ki kyrtong nalor ki 45 ngut ba dang shu dep pynban shen.
“Nalor ki 45 ngut, ka Congress kan sa pynbna biang iaki kyrtong namar ki dang don shuh shuh ki nongïalam na kiwei ki seng saiñ pyrthei ki ban sa wan ban pynïasoh ialade sha ka seng Congress” la ong u Mukul.
U Mukul ula ong ba kam pher lada ka Congress ka don MLA ne em ki ban iakhun ha kane ka ilekshon ban wan namar ki paidbah ka Meghalaya bad ka ri baroh kawei ki tip iaka nongrim bad ki kam ba kane Party ka la leh naduh ba la seng ia ka Congress.
U la ong ba ki paidbah ka jylla kim donkam ban syier iaki kyrtong ka Congress kiba iakhun ielekshon ha ka sien ba nyngkong hynrei kidei ban peit bad bishar iaka Party kaba la don naduh ba ka Meghalaya ka ioh iaka jylla ba pura.
