Guwahati, K’lyngkot 13 :Khyndiat sngi hadien ka jingshah pyniap u dkhot jong ka Bajrang Dal ha Karimganj district ka Assam, na ka liang ka Bajrang Dal kala pynlong ia ki jingiakhih paidbah ban dawa na u Myntri Rangbah (CM) ka Assam u Himanta Biswa Sarma ba un tuklar halor kane ka phang bad ban phah tohkit ha ka NIA halor kane ka jingjia.
Nalor kata ki nongialam ka Bajrang Dal kila dawa ruh na ka sorkar ba kan pynioh ia ka jingiarap kaba T.50 lak sha kiba haiing hasem jong utei u lanot.
Lah ban kdew ba ka Bajran Dal ka la pynlong ia ka jingiakhih paidbah ha Darrang bad Lakhimpur district bad la aiti ruh ia ka shithi sha u CM Sarma lyngba ki district collector.
Haba kren sha ki lad pathai khubor, ki dkhot jong ka Rashtriya Bajrang Dal ki la ong, “Ngi dawa ba kiba haiing hasem jong u Shambhu Kairi ki dei ban ioh ia ka jingiarap kaba T.50 lak.”
Da kaba kam ba u CM ka Assam ula leh bym suitniew ha kaba iadei bad ka jingkiew jong ki kam bymman jong ki kynhun Jihadi, uwei na ki nongtrei ka Bajrang Dal ula ong; “U CM Sarma um shym la shimkhia ha kaba iadei bad la ka jong ka kynhun seng..u CM ula kren ha kaba iadei bad ka Hindutva ha kiwei pat ki jylla hynrei um shym la phaikhmat ha kaba iadei bad ka Assam.”
Nalor kata na ka liang ka Rashtriya Bajrang Dal ka la dawa ruh da ka jingtohkit jong ka NIA ha kaba iadei bad katei ka jingjia shah pyniap bad ba ia kane ka case dei ban shimti da ka Fast track court.
Lah ban kdew hangne ba uwei u nongtrei ka Bajrang Dal u bym kwah ban pynpaw kyrteng ula kynnoh ba ka la don ka jingiapher jingmut kaba jur hapdeng ka Rashtriya Bajrang Dal bad ka Rashtriya Swayamsevak Sangh (RSS), kata ka daw kaba la pynlong ruh ia kiba bun bah ki dkhot bad ki nongkyrshan ka RSS kiba la leit ban pyniasoh noh bad ka Rashtriya Bajrang Dal.
“Ka RSS ha Assam kam don jingshaniah shuh ha u heh nongialam jong ka u Mohan Bhagwat,” ong u nongtrei ka Rashtriya Bajrang Dal.
Ha kawei pat ka liang, u nongialam ka Bajrang Dal na Karimganj la ong ba ula pyllait ia ka video kaba maham tyngeh ia u CM ka Assam lada um lah ban phah kem ia ki briew kiba donkti ha katei ka kam pyntriem hapoh ka 48 kynta.
Lah ban kdew ba ha ka 9 tarik mynta u bnai uwei u briew ula shah kem noh halor ka jingshah kynnoh donkti ha kaba pyniap ia u dkhot ka Bajrang Dal ia uba la tip kyrteng kum u Sambhu Koiri, ha ki bynta ka Lowairpur kaba jngai kumba 50 km na Karimganj bad kaba hap hapoh Bazaricherra Police Station.
U Koiri la ong ba u dang wanphai na ka jaka aijinghikai ba lai sngi jong ka Bajrang Dal ha ki bynta ba marjan ka Hailakandi district hadien ba ula shah pyniap noh.
