Imphal, K’lyngkot 13 :Ki samla pule ka Ghanapriya Women’s College ki la pynlong ka jingiakhih hynnin ka sngi Palei ban dawa ia ka jingiehnoh kam jong u Myntri ka tnat pule puthi halor ka jingshah kynnoh lehsting ka jong u ban khmih ha kaba iadei bad ki jingdonkam jong ka Dhanamanjuri University (DMU).
Ki samla pule na ki kolej kiba don ka jingiateh bad ka DMU mynta la buntylli ki snem kila iai dawa na ka bynta ban pynbiang ia ki jingdonkam ba kongsan ki ban lah ban pynurlong ia katei ka jaka pule kum ka university kaba pura ha ka jylla.Hynrei, watla katta kane ka jingdawa ka la pulom ban wan urlong kat haduh kine ki sngi.Da kaba pynrem ia ka jingleh jong ka sorkar, ki samla pule ka GP Woman’s College ki la pynlong da ka jingiaid rally bad khynra ruh ia ka ophis treikam (secretariat) jong u CM ka jylla.
Haba kren sha ki lad pathai khubor shibynta jong katei ka jingiakhih, na ka liang ka Social and Cultural secretary jong ki samla pule ka kolej ka Rashesori Meihoubam ka la ong ba ia ka DMU la dep ban tei naduh kine ki san snem ba la dep, hynrei namar ka jingbym lah ban pynbiang ia ki jingdonkam ba kongsan kumta ruh na ka liang ki samla pule ki la hap ban mad ia shibun ki jingeh.
“Kane ka jaka pule kam shym la shah pynhap ha ka thup 12 B status jong ka UGC kat haduh mynta namar ba ki samla pule kila pulom ban ioh ia ka scholarship bad fellowship. Ym tang wat tang iwei ruh ki nonghikai ki ban ioh ia ka jingithuh na ka UGC,” ong katei ka nongialam ki samla pule kaba la bynrap ruh ba namar ka jingduna jong ki nonghikai ki samla pule kila mad ia ka jingeh ban ioh ia ka jingpule kaba biang.
Shuh shuh ka la ong ba namar ka jingduna jong ki nonghikai ym don ruh ia ki registrar, examination controller ba thikna.Ka la ong ruh ba kane ka jingkyntait jong ka sorkar ia ka jingdawa ka jong ki ka long kaba sngew bynniaw shibun.
Haba khmih bniah halor kine kiei kiei baroh kala ong ba u Myntri ka tnat pule puthi ka jylla u Th Basantakumar u dei ban iehnoh kam.
