Shillong, K’lyngkot 13 : Ka Election Commission of India (ECI) kala hukum ia baroh ki kyrtong kiba la shah pynngat ha ki kam bymman ba kin pynbna paidbah ia ki ha ki kot khubor ne ki news channel.
“Ka Commission kala rai ba baroh ki Kyrtong, lada ki don ia ki kam bymman ba kila leh, ki dei ban pynbna paidbah ha ki kot khubor lai sngi lynter hakhmat duh bad ruh ha ki news channel khnang ba ki nongthep vote kin ioh jingtip shaphang jong ki. Lada ki dang kwah ban vote, kane kan dei ka rai jong ki nongthep vote, ka kamram jong ngi ka long ban buh ha ka rynsan paidbah, pynbna kat kaba lah” ong u Chief Election Commission (CEC) Rajiv Kumar haba iakren bad ki nongthoh khubor hynne ka sngi thohdieng ha Shillong.
Kat kum ka jingong jong u, ki Political Party kiba la ai ticket ia kine ki kyrteng ruh ki dei ban pynmih ia ki jingpynksan ha kajuh ka rukom.
“(Ki dei) ban batai bad ai ha ki kot khubor bad ai ruh ia ki jingpynksan ba balei kila jied ia u/ka briew ba don ia ki kam bymman. Hato ka eh ban ioh ia ki briew ba khlem don jingthohbria ha kano kano ka constituency. Ki political party ki dei ruh ban pynmih ia ka khnang ba ki nongthep vote kin tip ia ki nongrim bad ia kaei ka kam bymman ba kine ki kyrtong ki shah kynnoh” ula ong.
U Kumar ula pyntip ruh ba baroh ki bor pahara, ki briew ba pyniaid ia ka elekshon bad ki viting machine kin dei kiba la shim khlem da jied. “Ym dei ban don kiba tip hangnp ba ki Polling Booth kin ngat namar la leh khlem da ai jied. Ym don ruh ki bor pahara ki ban tip kiei ki pyrton ki ban leit shano” ula ong.
