SHILLONG, K’Lyngkot 13: Ka National People’s Party (NPP) kaba ialam iaka sorkar jylla kala kam ba ka la pynurlong lut iaki jingkular khamtam haba iadei bad ka kam tih dewiong.
Ia kane la pynbna ha ka kaiphod ba la ai kyrteng ‘Promises Delivered’ daka u president ka NPP u Conrad K Sangma u badei ruh national president ha ka jingialang kaba la long ha Polo.
Ka kaiphod ka kdew ba ka Party ka lah ban pynurlong iaki jingkular khamtam halor ka jingtih dewiong daka ba wanrah iaka Meghalaya Mineral (Prevention of Illegal Mining, Transportation and Storage) Rules, 2022 ban khang iaka jingtih dewiong, jingshalan beain bad kiwei kiwei ki kam beain halor dewiong.
Ka ong ba haduh mynta ki don 17 ngut ki ba la pan License naka bynta ban tih dewiong bad kane kadei ruh katkum ka hukum ka Supreme Court ha u snen 2019 ba ki trai jaka riew lum ki don ka hok iaka khyndew ka shyiap.
Ka party ka pyntip ruh ba ka sorkar kala pynieng iaki khyrdop Integrated Check Gates naka bynta ban tehlakam iaka jingshalan tuh dewiong bad kumjuh ruh ban pynbiang iaka rukom lum khajna.
Ka sorkar jylla kala kam ruh ba hashuwa ba ka sorkar MDA ka shimti iaka sorkar ha u snem 2018, ka jylla ka sahdien ha bun bynta kum ha ka pule put him, ka koit ka khiah, ka jur ka bamsap bad kiwei kiwei kam beain.
“Ka jylla kam shym la lah ban pynurlong ia bun tylli ki projek kam pynroi, bad ka jylla don ha trai duh jong ka GSDP bad hadien ka jingwan shimti ka MDA ka jylla kala kiew ha ki bun bynta” la ong ka kaiphod.
“Ka jinglah jong ka sorkar ha ka jingialam ka NPP ban pynurlong iaki jingkular bad kaba la pynlong iaka jylla Meghalaya ban kiew ha ki bun bynta kadei ruh lyngba ka jingiatreilang bad ki paidbah bad dei namar kane mynta ka kynti ki paidbah bad nongialam kila sdang wan iasoh bad ka party” la ong ka kaiphod.
Ka jylla kala shah pynkupburom ha bun bynta kum ha ka jingpyntrei iaka skhim Jal Jeevan Mission naka bynta ban sam um sha ki 2.8 lak tylli ki longing, la shah pynkupburom ha ka International United Nation naka bynta ka MeghEA project.
Ka NPP ka kam ruh ba watla ka khaii pateng ha kiwei ki bynta ka ri bad pyrthei ka hiar hynrei ka khaii pateng lane ka GDP jong ka jylla kala kiew 8% bad kane kadei ruh namar ba naka liang ka sorkar kala pyntreikam da ki buit stad mynta bad ka jylla kala shah pynkupburom daka Arogya Manthan award.
La batai ruh ba kane ka kaiphod ka pyni iaka jingjop jong ka NPP bad ki paralok kiba don ha ka sorkar namar ki don ka jingthmu ba khuid hashuwa ban thaw sorkar.
“Ka Meghalaya kala kiew bha sha khmat bad kala pynkhreh ruh ban nang wanrah shuh shuh iaki kam pynroi bad ka don ruh ka Plan naka bynta 5 snem ban wan” la ong ka kaiphod.
Haba kam ba ka party ka iaid bad ka trei katkum ka jingkwah u paidbah, kala ong ba ka la lah ban mang haduh T. 13,205 klur ha u snem 2018-2023 naka T. 8875 klur ha u snem 2014-2018.
La ong ba ka sorkar MDA ka la lah ruh ban wanrah shibun ki skhim ba kynthup ka Youth Policy, FOCUS & FOCUS+, YESS Meghalaya, PRIME, Skills Meghalaya, Green Meghalaya lem bad kiwei kiwei de.
Ka la ong ruh ba kane ka sorkar kala wanrah iaki jingkylla haba iadei bad ka rukom lum khajna naka jingtih mar poh khyndew, ki kali bad kiwei kiwei ban pyllang pisa naka bynta ban pyndonkam ha ki kam pynroi.
Ka kaiphod ka kdew ruh ba ka jinglum khajna kala kiew naka T. 1658 klur ha u snem 2019-2022 shaka T. 2412 klur ha u snem 2022-2023.
Haba iadei bad ka tnat ka koit ka khiah, ka kaiphod ka kdew ba ka sorkar ba ialam ka NPP ka la lah ban wanrah daka State Health Policy ha u snem 2021 daka ba pyntreikam 3 tylli ki shnat ba kynthup ka MOTHER naka bynta 2.2 lak ngut ki longkmie bad ka CM Safe Motherhood Scheme.
Ka kaiphod ka kren ruh ba naka liang ka sorkar kala ioh ruh kumba T. 2700 klur naka bynta ban pyntreikam iaki skhim sam um bad palat T. 1800 klur ban sam um sha ki 2.8 lak tylli ki long ing.
Ka NPP kala kular ruh ban thaw kham bun shuh shuh iaki surok hapoh ka jylla baroh kawei.
Ha ki jaka kyndong ka sorkar kala thaw 2,234 kms surok ha u snem 2018-2022 karba ha u snem 2014-2018 la shna tang kumba 700 kms ki surok.
