Shillong, K’lyngkot 13: U National President ka NPP bad Myntri Rangbah ka Jylla Conrad K Sangma ha ka sngi palei ula ong ba u Nongialam ka Liang Pyrshah Dr Mukul Sangma ula shim ia ka sienjam kaba rai kut ialade (risk) da kaba rai ban iakhun na artylli ki Constituency ha ka elekshon MLA-2023.
U Dr Mukul uba dei u MLA ka Songsak Constituency, ula rai ban iakhun ruh na Tikrikilla Constituency da kaba aidaw ba ka dei kat kum ka jingdawa ki paidbah bad ruh shibynta na ki buit sain pyrthei.
Haba kylli la kane ka dei ka jingpyrshang ban pynduh ia ka NPP ia kane ka seat, u Conrad ula ong “Phi lah ban niew ia ka kat kum ka jingiohi jong phi hynrei kaei kaba nga iohi ka long ba u Dr Mukul ula raikut ialade da kaba pynleit jingmut ha kj artylli ki jaka. Kam dei ka kam kaba suk. Namar kata, ka shong kat kum ka ningiohi jong phi ba un pynduh ia kawei ka seat ia ka NPP lane nga iohi ia ka kum ka jingrai kut ialade da kaba iakhun ar Constituency.
Haba kyntait ban kynthoh shuh shuh, une u Nongialam ka NPP ula ong ba ka long kaba sngewsih ba u Dr Mukul ula ieh ia ka Ampati na ka bynta ka songsak bad mynta un ieh ia ka Songsak na ka bynta ka Tikrikilla.
“Ka long kaba sngewsih ba ula ieh ia ki paidbah ka Ampati kiba la pynlong ia h kumne kumba u long bad phet sha Songsak. Ki paidbah ka Songsak kila ai ka jing shaniah bad ka jingngeit ha u hynrei mynta un leit sa sha Tikrikilla. Ngam tip u mut kumno bad kane ka dei ka rai shimet jong u bad ngam don eiei ban kynthoh ia kaei kaba u leh bad khlem leh. U dei ma u uba biang eh ban kren ia kata” ula ong.
Haba kylli balei ba u khlem mih iakhun na ar Constituency kat kum ki khubor hamsaia bala saphriang baroh shikatta, u Conrad ula ong ba ula rai kut ialade ban shakri ia ki paidbah ka South Tura.
“Nga la ju kren baroh shikatta ba ngam dei u briew ula kynthih kulmar, nga kwah ban pyni bad ai nuksa ia ka jinglong skhem. Ngim dei ban shu kynthih kulmar bad nga tharai ka jingrai kut ban shakri ia la ka Constituency bad ki paidbah ka dei kaba kham kongsan, kane ka dei kaba nyngkong eh ia nga… Namar kata nga la rai ban neh beit ha South Tura”.
“Nga la trei shitom bha ba kine ki san snem ban wanrah jingkylla ha sor Tura bad nga tharai ki ningpyrshang jong ngi kila pyni ia u soh. Ngi la sdang iohi wat ia ki kam pynroi kila wan ha Tura ruh bad namar ba ki kam kila iaid, nga thikna ba ki paidbah ka Tura sa shisien kin ai biang ka jingshaniah ha ka jinglong kyrtong jong nga ha kane ka elekshon ban wan bad nga sngewskhem ba ngan ioh ia ka jingjop” ong u Conrad.
