Shillong K’Lyngkot 12: U MLA barim ka Nongkrem bah Ardent Miller Basaiawmoit uba dei u kyrtong ka Voice of the People Party (VPP) u la kam ba ym pat don uno uno u nongmihkhmat u ban jop 15 snem na Nongkrem.
Haba kren ha ka jingialang kaba la long ha Motphran u bah Ardent u la ong ba ki paidbah ka Nongkrem kidei kiba stad bad kim biej pisa bad lada uno uno u nongmihkhmat u bym lah ban pynurlong iaki jingkular, ki paidbah ruh kin kyntait ban pynjop biang ia uta u kyrtong.
U bah Ardent ula ong ba ha Nongkrem ki paidbah ki jied san snem bad lada ki nongmihkhmat kim lah ban treikam, ki paidbah ruh kin kyntait bad dei namar kane haduh mynta ym pat don ba jop 15 snem na Nongkrem” la ong u bah Ardent.
U bah Ardent ula iathuh ba haduh mynta don tang 3 ngut kiba jop shiphew snem.
U la ong ba ha kine ki sngi la don ki heh spah ban kiew sha Nongkrem ban iakhun ilekshon hynrei haduh mynta kine hi heh spah kim tip ba ki paidbah ka Nongkrem kim dei ki ba biej pisa.
“Nga iohi ba kane ka ilekshon kan pher bha namar katba khot jingialang ki party hehspah, ki shlei beit ki paidbah hynrei kawei kaba nga tip ba u paidbah u la shah thok 50 snem hynrei 2023 un dei u snem ba ki paidbah kin thok kylla iaphi” la ong u bah Ardent.
Naka liang u MLA ka North Shillong konstitwensi u bah Adelbert Nongrum hynne ka sngi ula kubur ba shen un sa pyniasoh noh bad ka People Party (VPP) naka bynta ban iakhun ha kane ka ilekshon ban wan.
Ha ba kren ha kane ka sngi jingialang paidbah bala pynlong daka VPP ha Motphran u bah Adelbert ula ong ba ka jingthmu jong u ban mih noh naka seng Khun Hynniewtrep National Awakening Movement (KHNAM) kadei namar ka jingbym don jingia sngewthuh jingmut hapoh ka seng.
U bah Adelbert ula ong ba rai ban pyniasoh shaka VPP kadei namar kane ka party ka don ki nongialam kiba nang ba stad bad khatam ki ba shim khia naka bynta ka bha ka miat ki paidbah bad ka jylla baroh kawrei.
Ula ong ba kawei ka daw ban pynlong ia u ban pyniasoh shaka VPP kadei ruh namar kane ka party ka pyrshah iaka bam pong bad kane ka party bad ki nongialam ki kwah ban wanrah ka synshar ba khuid ba suba hapoh ka jylla.
“Ki paidbah ka jylla lada ki kwah ka synshar ka ba khuid bad ba suba kidei ban ailad ïa ka seng VPP da kaba namar ngi ngeit ha ka kam ym tang ha ka ktien” la ong u bah Adelbert.
