Shillong, Kyllalyngkot 12: U MLA ka South Shillong u Bah Sanbor Shullai hynne ka sngi u la buh ia u mawnongrim ban tei iaka surok ha Lower Lumparing haka jinglut jingsep kaba kot T.4,50,00,000 lyngba ka SPA Scheme 2022-23.
Ka jingbuh ia u Mawnongrim ban tei ia ka surok na Jingkieng Kong Nora Hynniewta kaban iasoh bad ka surok ha Mawnei, Lower Lumparing kaban pyniasoh pat bad ka surok ha Laban, ka long da ka jingthmu ban pynsuk ia ka leit ka wan jongki kali, naka bynta ka jingshngain jong ki khynnah skul bad kolej bad ki paidbah kiba iaid ba ieng.
Haba kren ha ka jingialang u Bah Sanbor ula pynthikna ba ka jingpyntreikam ia katei ka projek kan sdang noh mardor khlem da pynslem shuh bad ula pynpaw iaka jingthrang ba dei ban pyndep noh mardor ia kane ka projek khnang ba kan long ka jingkyrkhu ia u paidbah ka thaiñ Greater Lumparing bad Greater Laban.
Ula pynpaw ruh ia ka jingsngewnguh ia ki trai jaka kiba la noh synniang ei iaka jaka naka bynta ban pyniaid shakhmat ia katei ka projek bad ula iaroh ruh iaka jingshimkhia ki ophisar ka tnad PWD, ka sorkar jylla bad ki nongshong shnong ka thaiñ.
Ia katei ka prokram la pyniaid da u Bah Doncaster Shabong u Rangbah Shnong ka Lower Lumparing ha kaba la iadonlang u Rangbah Shnong ka Upper Lumparing Bah H.B. Wahlang, Rangbah Shnong ka Kynjat Phutbol-Riat Laban Bah Shaiphar Wahlang, ki dkhot jongka MCIC 19th South Shillong Constituency bad ki nongshong shnong ka thaiñ.
Ki nongkren haka jingialang kila iaroh ia u Bah Sanbor Shullai uba la trei shitom ha kaban wanrah ia ki kam pynroi bapher na ka bynta ka bha ka miat bad ka roi ka par jongki paidbah bad ka South Shillong Constituency baroh kawei. Kane ka long katkum ka kyrwoh na u Bah A Marwein, Secretaryka MCIC 19th South Shillong Constituency.
