Imphal, K’lyngkot 12 : Da kaba pynrem jur halor ka jingjia bthei bom ha Nagamapal Kangjabi Leirak ha Imphal West kaba la jia ha ka 9 tarik mynta u bnai, na ka liang ki trai shnong jong ka thain hynnin ka sngi ki la pynlong da ka jingiakhih shong kyllain mungor.
Haba kren sha ki lad pathai khubor hajan ka jaka pynlong jingiakhih, na ka liang u president jong ka Kangjabi Leirak Youth Club, Manipur u Sapam Suvankar ula ong ba ki trai shnong kila dep lypa ban pynbna ba kino kino ki kynhun kiba donkti ha katei ka kam thombor ki dei ban ai ka jingpynshai hapoh ka 48 kynta.Hynrei, ym kam shym la don kano kano ka jubab wat hadien ba la kut katei ka por ba la buh.
Na ka liang ki tnat syntiat ka sorkar pdeng bad sorkar jylla ruh kim shym la ioh pdiang kano kano ka khubor kaba iadei bad ka jingshim jingkitkhlieh na kino kino ki kynhun seng ha kaba iadei bad katei ka jingjia, ong utei u president.
Haba kyrpad ia u Myntri Rangbah (CM) ka jylla u Biren Singh uba bat ruh ia ka tnat kam pohiing ka jylla ban lap ia ka daw bad ia ka kynhun kaba donkti ha katei ka kam thombor, utei u president ula ong ba katei ka jingbthei bom kaba triem kala wanrah ka jingshong syier kaba jur ia ki nongshong shnong jong ka thain.
Kiba kum kine ki kam thombor hapoh ki jaka shong shnong kin ktah jur ia ka imlang ka sahlang bad wanrah ka jingsyier kaba neh slem hapdeng ki nongshong shnong. Ka long kaba donkam kyrkieh ban shim ia ki lad jingiada khnang ban lah ban khanglad ia kiba kum kine ki jingjia hadien habud.Ka sorkar jylla ka dei ban thwet ban kem ia kiba donkti ha kane ka kam bymman, ong shuh shuh utei u nongialam.
Kum ban shu pynkynmaw u bom uba khlainbor bah ula bthei noh shabar ka khyrdop jong kawei ka iing ha ka thain kaba hap hapoh Nagamapal Kangjabi Leirak Imphal Police Station, Manipur ha ka miet jong ka 9 tarik mynta u bnai, ong ka tyllong khubor.
Ka tyllong khubor kala kam ruh ba ia une u bom la pynbthei da ki runar ki bym lah ban ithuh hakhmat ka khyrdop iing jong uwei u briew uba la tip kyrteng kum u Doren Leikangbam.
Hynrei watla katta ia ka daw tynrai halor katei ka kam thombor ym pat lah ban tip thikna, bad ha katei ka jingjia ym shym la don kino kino ki ban ngat ha ki jingmynsaw lait noh ki jingjulor ia ki jingdon jingem.
