Guwahati, K’lyngkot 12: Ka jingsyier bad klumar jingmut hapdeng ki nongshong shnong hapoh Champhai district ka Mizoram kala wan jia hadien ba ki shipai ka Myanmar kila ther bom ia ka ktem lehnoh ha ki jaka khappud bad ka Mizoram ha kane ka sngi ba Ar ba la lah.
Ka Champhai district ka Mizoram ka don markhap bad katei ka ktem lehnoh kaba ki shipai ka Myanmar kila ther bom bad pyniap ia ki lehnoh kiba shongrieh ha katei ka jaka.Katkum ki khubor la ong ba uwei na ki bom ula wan hap sha ki bynta jong ka India hynrei kam shym la don kano kano ka jingjia ba sngewsih sha ka liang ki nongshong shnong.
Kawei ka trok kaba don harud jong kawei hajan katei ka jaka khappud kala julor na kane ka jingshah ther bom.Kiba kum kine ki jingther bom kiba na suin ki la jia ruh ha kiwei pat ki bynta jong ka Myanmar kaba la pynmih ruh ia ka jingiakynad bad ka Bangladesh kumjuh bad ka Thailand.
Katkum ki khubor la ong ba san ngut ki dkhot jong ka kynhun Chin Human Rights Organisation ki la iap na ka jingshah ther bom kaba na suin hapoh ka Camp Victoria ha ka jylla Chin ha kane ka janmiet sngi ba Ar ba la lah.
Ka shnong Farkawn ka Mizoram ka don hapoh ka 2 haduh 5 kilomitar ka jingjngai na ka Camp Victoria, ka jaka ha kaba katei ka jingther bom ka la jia.
Ki nongshong shnong kane ka thain kila don hapdeng ka jingsyier bad klumar jingmut hadien katei ka jingshah ther bom.Ki tyllong khubor ki iathuh ba ki nongshong shnong kiba trei sha ki bynta khappud ka Myanmar hajan ka wah Tiau kaba pyniakhlad ia ka jaka khappud kila hap ban phet krad noh na la ki jong ki iing ki sem.
Ka Camp Victoria ka dei ka headquarter jong ka Chin National Army (CNA), ka kynhun kieng atiar ha ka jylla China.Kane ka kynhun kieng atiar la slem kam shym la treikam shuh, hynrei naduh ka 1 tarik Rymphang 2021, ka sngi ha kaba ki shipai ka Myanmar kila kurup jubor ia ka bor synshar hapoh ka ri, kane ka kynhun kala pyniasoh bad ki riewialeh pyrshah kiba kyrshan ia ka synshar paidbah ha ka jingialeh pyrshah ia ki shipai junta ka Myanmar.
