Shillong, Kyllalyngkot 11: U Myntri Rangbah ka jylla u Conrad K Sangma hynne ka sngi ula pyllait paidbah ia ki 10 tylli ki bos skul ba leit shaw leit on ia ki khynnah skul (Shared School Bus System) bad ia ki kali kit nongjngoh kai (Prime Tourist Vehicles) bad Prime Agriculture Response Vehicles ha ka jingialang kaba la long ha Soso Tham Auditorium, Shillong.
Flagged the buses as part of the Shared School Bus System of STEMS(State Transport & Efficient Mobility Society) in Shillong. This envisages to create a mode shift in school travel from private four-wheelers to school buses & will ease traffic jam issues to a great extent pic.twitter.com/aC9IDOjl6M
— Conrad Sangma (@SangmaConrad) January 11, 2023
Haba kren ha ka jingialang u Myntri Rangbah ula ong, ba ka Sustainable Transport and Efficient Mobility Society (STEMS) program ka dei ka program kaba pynleit jingmut ha kaban pynbiang iaki kali kit briew bad ban weng iaka jingkhapngiah ha ka nongbah Shillong kaba long ka mat kaba khia bha.
“Ngi la iatai halor kiba bun ki jingai jingmut ha ki snem kiba la dep bad ngi la iakhun tyngeh ban weng ia ki jingeh bad khamtam haba kane ka jingeh kala nang iai mih bad heh man la ka sngi bad kumta la iatai sani bha ha kaba iadei bad ka STEMS program,” ong u Myntri Rangbah.
“Kila don bun ki jingpyrshang kiba ngi la khmih bniah bha bad la pynwan dur ha kata ka rukom iaka jingdonkam jong ka nongbah Shillong bad iaka jingdonkam jong baroh kiba don bynta lang ha ka kam bad nga ngeit skhem ba kane ka prokram kan long kaba iaid beit bad kaba seisoh” ong u Conrad Sangma haba pyntip ba ia katei ka prokram yn sa pyntreikam ruh wat ha kiwei ki bynta jong ka jylla Meghalaya.
Ha kaba iadei bad ka Prime Agriculture Response Vehicles, u Myntri Rangbah ula ong, ki nong rep kila mad bun ki jingeh ha kaban kit ia ki marep ki jongki sha ki iew ki hat.
“Ngi la rai ba man la u snem ngin bteng ia kane ka prokram bad ngin pyrshang ban pyniar ia ka jingshakri sha ki kynhun jong ki nongrep khnang ba ki nongrep kin don ia ka network kaba khlain haka jingkit jingbah ia ki marrep kaban long ka jingiarap ia ki nongrep” ong u Conrad.
U Myntri Rangbah ula ong ki Prime Tourist Vehicles kidei ki sienjam ban kyntiew ha ka liang jong ka kam jngohkai ban pynbiang ia ki kali na ka bynta ki nongjngohkai bad ha kajuh ka por ban aikam aijam iaki nongsengkam lajong.
U Myntri Rnagbah ula pynpaw ruh ia ki jingthmu jong ka sorkar jylla ban pyntreikam iaki prokram bad ki projek na ka bynta ban weng iaka jingdheng kali haka nongbah Shillong.
Hashwa kane, ka CEO jongka STEMS, Kong Isawanda Laloo, kala ong ba ki bos kiba la pyllait kin dei kiban pyndonkam da ki skul bapher bapher ban leit on leit shaw ia ki khynnah bad da kine kijuh ki bos lah ruh ha kaban pyndonkam naka bynta ban kit ia ki nongtrei sorkar bad ha ki sngi shuti lah ban pyndonkam ia kitei ki bos da ki nongwan jngohkai kaban long ka lad ia kitei ki bos ban biang ka kamai kajih.
Ka STEMS ka kynthup ia ki riewpawkhmat naka tnad Traffic, Police, Education, Transport, District Administration bad Urban Affairs.
Ki bos kiba la pyllait paidbah hynne ka sngi kidei kiba don 5 tylli ki CCTV camera bad kiba don ruh ia ki GPS kiba lah ban tip ia ka jingdon ka bos ha kano ka jaka bad ki jingtip na ka bynta ki nongshong ha ka bus bad ki LED Screen kiban pynia iaka lynti iaid jong ka Bos.
Ka NIC kan pynmih iaka Mobile Application bad Website na ka bynta ban tip iaka leit ka wan jong ka bos bad yn pyndonkam iaka tnad Transport naka bynta ban shim wai ia ka Bos bad ban khmih ia kitei ki Bos bad ia ki nongniah bad ki nongsumar jong kitei ki bos yn sa ai jinghikai da ka Meghalaya Skills Development Society.
