Shillong, K’lyngkot 11 : Sa arngut ki MLA ka All India Trinamool Congress (AITC), kila aiti ia ka shithi iehnohkam kum ki Dkhot ka Iingdorbar Thaw Ain ka Jylla hynne ka sngi Balang, bad pynkhreh ialade ban leit iasoh noh sha ka National Peoples’ Party (NPP).
Kine ki arngut ki MLA ka AITC ki dei u Jimmy D Sangma uba mihkhmat ia ka Tikrikilla Constituency bad u Marthos J Sangma ba mihkhmat ia ka Mendipathar Constituency.
Kine ki MLA kila aiti ia ka shithi iehnohkam ha u Lamphang ka Iingdorbar Thaw Ain Bah Metbah Lyngdoh.
Ha ryngkat kine ki MLA, ki Dkhot ka Iingdorbar ne MLA kiba la iehnohkam mynta kila kot sha ka 12 ngut bad kiba sah ki long 48 ngut.
U Marthos bad u Jimmy kila pynkhreh ban leit iasoh noh sha ka NPP bad ban mih kum ki kyrtong na kane ka party ha ka elekshon MLA-2023.
Ka AITC kaba don 12 ngut ki MLA kiba la wan pyniasoh na ka Congress, ka don mynta sa 9 ngut.
Uwei pat u MLA ba phet na ka AITC u dei u Bah Himalaya M Shangpliang, uba la leit pyniasoh ialade sha ka Bharatiya Janata Party.
U Jimmy D Sangma bad u Marthon Sangma kin pyniasoh noh lashai ka sngi sha ka NPP bad yn pdiang burom ia ki da ki Nongialam ka Party kynthup u National President uba dei ruh u Myntri Rangbah ka Jylla Conrad K Sangma
