Shillong, K’lyngkot 11 : U Myntri Rangbah ka Jylla Conrad K Sangma hynne ka sngi Balang, u pyntip ba ki arngut ki Heprit kiba jah rngai ha ka jingjia pluh iing hynnin ka miet ha Mawbah, kila khlad noh.
“U MLA ula iakren bad ka Deputy Commissioner lem bad ia nga, na ka liang jong nga, ngan sa khmih ia kiei kiei baroh bad kat kum ki kyndon kiba don” ong u Myntri Rangbah haba iakren bad ki nongthoh khubor.
“Ka dei ka jingjia kaba sngewsih namar arngut ki Heprit kila khlad bad namar kata, ka dei ka jingduh kaba khraw ia ki bad khlem pep, ka Sorkar kan sa iarap kat kaba don ka lynti” ula bynrap.
Ka ding kaba klang bha, kala bamduh ia san tylli ki Iing hynnin ka miet ha Mawbah bad ka jingbthei jong ki tyndong lyer shet jingshet, kala pyniingkhong khait ia kine ki Iing jong ki san tylli ki Longiing.
Ha kajuh ka por, u Myntri Rangbah ula kyntait ban kynthoh ia ka khubor halor ka jingiap ki lai ngut ki briew na ka jingtih dewiong beain ha East Jaintia Hills.
“Ngi khlem pat ioh ia kano kano ka jingtip ne ka jingpynthikna halor kane ka kam. Ngi la shu iohsngew ia kane hynrei kam pat don ka jingpynthikna ia kane ka jingiap” ula ong.
