Shillong, K’lyngkot 10 : Ka ICAR Research Complex ka North Eastern Hills Region, Meghalaya kala iasoi ia ka MoU bad ka University of Science & Technology Meghalaya (USTM) ban iatreilang ha ki kam Research bad ka pule dangle kat kum ka ICAR New Delhi Guidelines.
Ia kane ka MoU la iasoi hynne ka sngi ba-ar ha Headquarter, Umiam bad ka USTM kan dei ka University shimet ba nyngkong ban iatehlok bad ka ICAR, Umiam ban iatreilang ha ki kam leh research bad pule dangle ha ki kam rep kam riang bad ki jingpyndonkam ia ka jingstad saian.
Kane ka MoU kan long ka jingmyntoi kaba khraw ia baroh arliang mamla ba kin pyndonkam ia ki jingnang jingtip ba mar kylliang ha kaban kyntiew ia ka bha ka miat jong ki paid nongrep, ki samla pule bad khamtam eh ia ka roi ka par jong ka thain Shatei Lam Mihngi.
