Guwahati, K’lyngkot 10 : Ka Sorkar Assam kala leit ban kyndang biang da ki bulldozer ia ki longiing kiba kyntur ha ka jaka khlaw jong ka Sorkar ha Lakhimpur District hynne ka sngi.
Kiba bun ki longiing ba sah beain ha kane ka khlaw sorkar, kila dep ban pynpra hi dalade ia ka Iing bad kila phet shnong sha kiwei pat ki jaka.
Palat 800 ngut ki bor pahara kynthup ia ki Pulit ka Jylla bad ki CRPF kila leit ban ai pahara ha kane ka jingkyndang ia ki Iing bein ha khlaw Pabha Reserve Forest ban pynthikna ba ka kam kan iaid beit iaid ryntih.
Ha kane ka khlaw kaba heh haduh 2,560.25 hectare, tang 29 hectare ka dang lait na ka jingkyntur pud. Da ki spah tylli ki Longiing kila kyntur sha kane ka khlaw sorkar ha kine ki phew snem bala leit noh. Kine ki briew ki kynthup ia kiba wan na kiwei pat ki jaka bad ruh ki trai shnong, kiba la krih na ka jingshlei um, bad jingshah rong noh ki jaka sah ha ka umsaw.
Haduh 500 hectare ka jaka ha ka shnong jong ka Adhasona bad Mohaghuli la lah ban pynkhuid ia ki nongshong beain.
