Karimganj, K’lyngkot 09 :Arngut ki nongleit shangkai piknik kila duh ei la ka jingim katba 11 ngut kiwei pat ki la ngat ha ki jingmynsaw na ka jingkylla kali hapoh Karimganj district ka Assam, ong ka khubor heh pulit hynnin ka sngi U Blei.
Kumta u heh pulit la ong ba ka kali kaba kit ia kine ki nongleit shangkai piknik kala kylla khongpong sha ka jaka ba long riat ha ka thain Ratabari ha ka janmiet sngi Saitjain ba la lah.
Katkum ka khubor la iathuh ba ka kynhun jong ki khynnah samla kila pynlong ka jingleit shangkai sngewbha sha ki bynta ba marjan ha Hailakandi hadien ba kane ka kali kaba ki shong kala kylla khongpong noh shwa ban poi ha katei ka jaka.
Ki tyllong khubor ki iathuh ba ia kine kiba la khlad noh la tip kyrteng kum u Aftab Uddin Laskar bad u Biswajit Lohar kiba shong ba sah ha ki bynta jong ka Kathlisera Sourangi kaba hapoh Hailakandi district.
“Ki la don baroh 13 ngut hapoh kane ka kali.Ngi la leit shangkai sha ki bynta jong ka thain Chatasera Prafulla Bagan kaba hapoh Hailakandi.U nongniah jong kane ka kali um shym la lah ban tehlakam ha kawei ka jaka khongkong kaba khim hapoh kawei ka jaka ba long lum bad hap sha ka jaka riat,” ong uwei na ki nongleit shangkai.
“Ia kito kiba la pynmynsaw la pynkit noh shapoh kawei ka hospital kaba rit ha Katlicherra hashwa ban pynkynriah shapoh Silchar Medical College and Hospital (SMCH)”, ula ong shuh shuh.
Na ka liang u heh pulit ula ong ba ia ka kam aijingiarap la wan iashim bynta lang da ki trai shnong ha ryngkat ki bor pulit napoh Ratabari police station kaba marjan.
