Agartala, K’lyngkot 09 : Ka MP ka Lok Sabha kaba dei ruh ka nongialam ba la rim ka BJP ka Locket Chatterjee hynne ka sngi kala kyrpad ia ki paidbah ka jylla ba kin dang pynneh biang ia ka sorkar BJP ha une u snem 2023 na ka bynta ban ioh pdiang shuh shuh ia ka roi ka par ha ka jylla.
Ia kane ka Locket kala pynpaw haba kren ha ka jingiaid leh niam ‘Jana Viswas Yatra’ ha Manughat Bazar kaba hap hapoh Karamcherra Assembly hapoh Dhalai district.
Haba kren ha ka jngialang ka MP kaba dei ruh ka puron ka Locket Chatterjee ka la ong ba ki paidbah ki lah ban wanrah ia ka jingkylla ha u snem 2018, bad ban pynneh ia kane ka jingkylla na ka liang ka BJP ka la pynlong da kane ka rally lehniam ‘Jana Viswas Yatra’.
“Ki paidbah ki la ai ka jingkyrkhu ha kane ka rally namar ha u snem 2018 ki paidbah kila iakhun ia ka jinglaitluid na ka jingsynshar ba mutlop jong ka sorkar Left Front bad hadien kiba bun bah ki jingeh ka BJP ka la lah ban thaw ia ka sorkar.Sa kawei pat ka lad ka kabu kala wan na ka bynta ki paidbah ka jylla Tripura.Nga kyntu ia ki paidbah ba kin vote ia ka BJP ha ka bor sa shisien pat mynta u 2023,” ong ka MP Locket Chatterjee.
Nalor kata ka Locket kala kam ruh ba ka Tripura ka la sakhi ia kiba bun ki kam pynroi hapoh ka jingialam jong u myntri rangbah (CM) barim u Biplab Kumar Deb bad hapoh ka jingialam jong une u CM ba mynta u Dr Manik Saha.
“Kane ka sorkar ka la pynurlong ia ki jingdonkam ba kongsan hapdeng ki riew paidbah.Kumta ruh ka BJP kala ioh jaka ha ki jingmut jingpyrkhat bad ha ki mynsiem ki jong ki.Kumjuh ka sorkar ba la lamkhmat da u Myntri Rangbahduh (PM) Narendra Modi kala pynkhreh kyrpang halor baroh ki jingdonkam, kata kynthup ha kaba iadei bad ka bording ilektrik ka umbam umdih, ki surok bad ha ka liang ka koit ka khiah,” ong shuh shuh katei ka MP.
Shuh shuh ka la ong ba da ka jingshaniah tylli ha ki paidbah kane ka sorkar ka dang iai bteng ban trei na ka bynta ka bha ka miat jong ki nongshong shnong ha kine ki sngi ki por ki ban wan bad ka BJP sa shisien pat kan thaw ia ka sorkar.Kam don kano kano ka jingartatien ba ka BJP kan ioh ban thaw ia ka sorkar mynta u 2023 na ka bynta ka roi ka par kaba thymmai.
Nalor ka Locket ha kane ka jingialang la ia don lang ruh ka Myntri khynnah ka sorkar pdeng ka Pratima Bhoumik, u myntri ka sorkar pdeng u Faggan Singh Kulaste, ka myntri ka tnat Social Welfare ka Santana Chakma, u General Secretary ka BJP ka Tripura u Amit Rakshit, u MLA Sambhu Lal Chakma lem bad kiwei pat.
