Shillong, Kyllalyngkot 09: U President ka United Democratic Party (UDP) u Bah Metbah Lyngdoh ula pynthikna ba ka UDP kan shimkhia ia ka jingeh ha kaba iadei bad ka jingshah thombor ki Khristan lada ka wan ha ka bor ha u 2023.
“Lada ngi ioh ia ka bor synshar ban ialam iaka jylla, ngin shimkhia ia baroh ki jingsngewkhia” ong u Bah Metbah Lyngdoh haba iakren bad ki nongthoh khubor, hynne ka Lah Sngi u Blei.
U Bah Metbah ula pynkynmaw ba haka por ba ka Draupadi Murmu kala wan sha ka jylla ha ka jingiakhun iaka elekshon President jong ka ri India, ula kren ia katei ka mat ba ki don bun ki jingshah thombor jong ki Khristan bad ka long kaba donkam ban shimkhia halor katei ka mat khnang ba kum kitei ki jingjia kin ym jia shuh nangne shakhmat.
Ha kaba iadei bad ka jingkylli ia ka nongrim kaba ka seng UDP ka ïeng ha kaba iadei bad ka Uniform Civil Code (UCC), u Bah Metbah ula ong, “ïa kane ka mat dang donkam ban iatai bniah shwa bad ngi sngew ba kam long kaba iahap ba kin iaid shakhmat”.
Ha kaba iadei bad ka shithi kaba pan ia ki jingtip ia ka jingdon jong ki ïingmane, ka jingpynkylla niam ha Assam, u President ka UDP ula ong, “Kum kitei ki shithi dei ban ai da ka jubab kaba biang bha ha ka lynti kaba dei khnang ba kan ym don kano kano ka jingktah ia ki ïingmane ne ia ki riewngeit Khristan kiba sah hapoh jong ka jylla”.
U Bah Metbah ula ong, ka UDP kala iatreilang bad ka NPP bad kiwei de ki seng kynthup ia ka BJP bad ka BJP ruh ka don lang haka sorkar tangba kam mut pat ba lada don ka BJP ngim lah shuh ban don lang ha ka sorkar hynrei haba don kino kino ki ishu kiba ktah ia u paidbah ka jylla, ngin rah ia kitei ki mat bad ngin pynthikna ba ki jingai jingmut ki jongki yn ym lah ban pdiang da ngi ka UDP”.
