Tura, K’lyngkot 08: U Myntri Khynnah ka Minority Affairs John Barla, hynnin ka sngi ula lum ia ka jingialang bad ki Khlieh jong ki Tnad bapher bapher ha Ri-Lum Garo ha Tura, ban bishar kam (review) halor ka jingpyntreikam ia ki skhim ka Sorkar Pdeng ha Ri-lum Garo.
Ha kane ka jingialang, u John Barla ula kyntu ia baroh ki Ophisar ka District ba kin pynsngewthuh bad pynshai ia ki paidbah halor ki skhim bapher bapher bala ai da ka Sorkar Pdeng kiba iadei bad ka pule puthi, ki kam pynroi bad ki skhim ban kyntiew ia ka jingim jong ki briew hapoh a thain.
Ula kyntu ruh ia ki ban ai ka jingshakri hok bad ka jingaiti ia ka kam na ka bynta ka jingmyntoi jong ki paidbah bad ruh ban synniang lem sha ka jingkiew shaphang jong ka thain da kaba pyntreikam ia ki kam pynroi kumba ki dei ban long hapoh ka thain.
Haba pynpaw ba ki don bun jait ki skhim kiba la pyllait da ka Sorkar India na ka bynta ka jingbha ki paidbah, u Myntri Khynnah ula pyntip ba bun ki skhim ki don n aka bynta ki jaidbynriew rit paid hynrei ki paidbah ki dei ban tip kumno ban aplai ia ki bad namar kata, ula kyntu ia ki Ophisar ba kin iarap ia ki paidbah ba kin ioh ia kine ki skhim hadien habud.
Shuwa kane, u Deputy Commissioner ka West Garo Hills Swapnil Tembe ula ai ka jingbatai halor ka District bad ki kam ba la leh kynthup ia ka jingiaid ka Jal Jeeven Mission, Aadhar Enrolment bad kiwei kiwei katba u Project Director ka DRDA, Tura Dolrich Berin G Momin ula kren halor ka PMGSY, PMAY, Amrit Sarovar skhim bala pyntrei ha ka thain.
Ki Additional Deputy Commissioner bad ki Ophisar na ki District kila iadonlang ha kane ka jingialang bishar kam.
