Shillong, K’lyngkot 07 : Ka Kynhun na Election Commission of India (ECI) bala khlieh da u Chief Election Commissioner Rajiv Kumar, kin wan ban iuhkjat lashem taiew ha baroh lai tylli ki jylla ka thain Shatei Lam Mihngi kynthup ha Meghalaya, ki ban leit sha ka Elekshon MLA mynta u snem.
Kane ka Kynhun kan wan naduh ka 11 tarik Kyllalyngkot bad ki Jylla ki kynthup ia ka Tripura, Meghalaya bad ka Nagaland, ki ban leit sha ka elekshon MLA satang arbnai eiei.
Kane ka Kynhun kan leit iuhkjat nyngkong ha Tripura ha ka 11 tarik bad kan sah arsngi ha kane ka Jylla bad kan iakynduh ia ki Nongpyniaid Elekshon lem bad ki Ophisar ban iasyllok halor ka jingpynkhreh ia ka elekshon bad ban ai jingbthah ruh ia ki bor ka Sorkar Jylla ba kin pynlong ia ka elekshon kaba khuid, ba suba.
Na Agartala, kane ka Kynhun kan wan sha Shillong, ka Nongbah jong ka Jylla Meghalaya ha ka 13 tarik Kyllalyngkot bad nangne kan leit sha Nagaland ha ka 14 tarik.
Ki khubor ki iathuh ba hangne ha Shillong ruh, kane ka kynhun na ECI kan sa iakynduh ia u Chief Electoral Officer (CEO) ka Jylla lem bad kiwei kiwei ki Ophisar ka Jylla bad kan sa ai jingbthah ruh ban pynlong ia ka elekshon kaba khuid ba suba bad ba iaid beit iaid ryntih. Kane ka Kynhun kan iakynduh ruh ia ki seng sain pyrthei jong ka Jylla.
Hadien ka jingleit phai sha Delhi, ka Election Commission kan sa pynbna noh ia ka tarik ban pynlong ia ka Elekshon ha baroh kine ki lai tylli ki Jylla ka thain Shatei Lam Mihngi.
Halor ka jingbthah jong ka ECI, baroh lai tylli ki Jylla kila dep ban pynmih ia ka Electoral Roll ba khatduh myn ha ka 5 tarik u Kyllalyngkot hadien ka jingpynrung kyrteng thymmai ia ki nongthep vote.
