Shillong, Kyllalyngkot 07: Ki shipai BSF jong ka BOP Kakergora, 193 Bn BSF ha ka 6 tarik mynta u bnai kila ioh kurup haduh 300 Kilogram u shniuh briew uba shongdor T.30 Lak.
Utei u shniuh briew udei uba la pynkit na nongbah Shillong sha ka shnong Jamador, South West Khasi Hills bad nangne la khaii beain sha ri Bangladesh.
Ia kitei ki shniuh briew kiba la ioh kurup da ki shipai BSF la aiti noh sha ka tnad Custom Balat, East Khasi Hills, Meghalaya.
Dang shen ka ri Bangladesh kala kylla long ka ktem jaka jong ka jingkhaii shniuh bad na kane ka ri la shalan ia kitei ki shniuh sha China bad Taiwan.
Kham mynshwa, la shalan ia ki shniuh briew na Myanmar.
Ia kitei ki shniuh briew la pyndonkam ban shna ia ki ‘Wig’ ia kaba jingdawa ka jur bha bha kylleng satlak ki ri.
Ha u snem ba la dep ki BSF kila ioh kurup 225 Kg u shniuh briew na ki thain khappud bad ka ri Bangladesh.
