Nongpoh, K’lyngkot 06: U Bah Jason Sawkmie Mawlong uba dang shu iehnohkam kum u MLA ka Umsning ha ryngkat bad u MDC barim Bah Donkupar Sumer lem bad ki paid Nongkyrshan, kila leit ban pyniasoh ialade hynne ka sngi thohdieng sha ka National People’s Party (NPP) ban pynkhlain ia kane ka seng sha ka elekshon MLA-2023.
We are also happy to welcome Sh. Donkupar Sumer, former MDC to the NPP family. The joining of these two leaders to the NPP will strengthen our reach in Umsning Constituency. pic.twitter.com/09gBwCjdvK
— Conrad Sangma (@SangmaConrad) January 6, 2023
Ia kine ki Nongmihkhmat barim ka Umsning bad ki Nongkyrshan, la pdiang sngewbha da u National President bad Myntri Rangbah ka Jylla Conrad K Sangma ha ka jingiadon ryngkat u National Vice President bad Symbud Myntri Rangbah Bah Prestone Tynsong, u President ka NPP-Meghalaya bad MP ka Rajya Sabha Dr WR Kharlukhi.
Kiba la iadonlang ha kane ka sngi ki kynthup ia I kong Ampareen Lyngdoh MLA barim ka Laitumkhrah, bah Ngaitlang Dhar MLA barim ka Umroi, bah Sosthenes Sohtun MLA ka Jirang, ka kong Macdalyne Mawlong MDC Umsning bad kiwei kiwei ki nongialam bad ki nongkitkam ka NPP.
Ha kane ka sngi, u Conrad K Sangma ula pynbna ruh ia u Bah Jason Sawkmie Mawlong kum u kyrtong ka NPP sha ka elekshon MLA-2023 ban long ha Jylla.
Haba kren ha ka jingialang, u Conrad ula pynpaw ia ka jingkmen ban sakhi ia kane ka sngi ha kaba arngut ki Nongialam ba radbah ka Umsning Constituency, kila wan pyniasoh ialade sha ka NPP.
“Bun ki Nongialam jong ki seng bapher bapher kila kren bein ia ka NPP bad ki kwah ban pynbudnam ia ka NPP da kaba kynthoh kumne kumtai, hynrei ka NPP kan ym pynsngap ia kine ki jingkynthoh namar ki dei tang ki jingkren ba khlem nongrim bad kiba shu kwah pynthohbria” ong u Conrad.
U Conrad ula pyntip ruh ba bun ki Nongialam na ki seng sain pyrthei bapher bapher kila wan ban iasoh ialade bad ka NPP namar ki iohi ba ka NPP ka lah ban wanrah ia kiba bun ki jingkylla la ka dei ha ka roi ka par ne ki kam kiba ktah ia ka jingim jong ki nongshongshnong.
“Kane ka Sorkar ba mynta ka dei kaba don jingkitkhlieh shisha na ka bynta ki paidbah bad kala leh shibun ki kam kiba kiwei pat ki seng sain pyrthei kila kynran dien lada kren ia ka kam pynbeit khappud, ka them metor ne kiwei kiwei. Ka dei ruh ka sorkar kaba phaikhmat kyrpang sha ki nongrep, ki SHG, ki longkmie, ki samla da kaba wanrah ia ki skhim ba bun jait bun rukom kiban ai jingmyntoi bad kyntiew ia ka ioh ka kot bad ka jingim jong ki” ula ong.
U Conrad Sangma u la pynpaw ruh, ba kane ka sorkar kan dang bteng ban nang kyntiew ia ka roi ka par ha ka jylla bad kum u Nongialam u kyrmen skhem ba ha ka election ka ban wan, ka seng NPP kan ioh biang ban thaw ia ka Sorkar hapoh ka jylla Meghalaya hadien ka jingjop ha kiba bun tylli ki Constituency.
U Bah Jason Sawkmie haba ai jingkren, ula pynshai ba ka jingmih jong u n aka PDF ban leit iasoh sha ka NPP ka dei namar ka jingiohi b aka NPP ka dei kaba lah shisha ban wanrah ia ka roi ka par ia ka Jylla.
“Ka NPP ka dei kaba nud ban mih shakhmat ban shim ia ki mat kiba kongsan jong ka Jylla kaba la jam sha ka 50 snem pura bad kine ki mat ki kynthup ia ka jingpynbeit noh ia u pud u sam bad ka Assam nalor kiwei kiwei ki mat kiba ki paidbah ki angnud ban ioh ia ki jingkylla” ula ong.
Kumjuh ruh u Bah Donkupar Sumer ula pynpaw ia ka jingkem ban ioh iadon bynta lang bad ka seng NPP kaba don ia ka jingthmu kaba bha na ka bynta ka Jylla.
Ula pynshai ba ka daw bah kaba pynlong ia u ban mih noh n aka UDP ka dei halor ka nongrim ba kane ka seng kam khein snep satia ia u kum u Nongialam nalor ka jingtreikam kaba sopsop hapdeng ki nongialam. Ula ong ba ka UDP hi kam don satia ia kata ka lawei ba phyrnai ban ialam ne wanrah jingkylla ha ka Jylla.
