Boko, K’lyngkot 06 :Ka jingiakynad ka la khie kynsan namar ka jingiakajia pud hapdeng ka Assam bad ka Meghalaya hapoh ka shnong Bhalukmari kaba hap hapoh Boko revenue circle ha ka 5 tarik mynta u bnai.
Katkum ki khubor la iathuh ba ki katto katne ki nongialam na Meghalaya kila pynlong ia ka jingialang hapoh kawei ka skul shimet ha ka shnong Bhalukmari kaba hapoh Assam.Hadien ba u nongialam shnong ula khang pyrshah ia ki ba kin pynlong ia kiba kum kine ki jingialang, kine ki briew kila kam ba kane ka dei ka jaka jong ki bad pyrshang ban thombor ia ki nongshong shnong na Assam.
“Katto katne ki nongkyrshan na Meghalaya ha ryngkat khyndiat ngut ki nongialam na Meghalaya ki la pynlong ia ka jingialang ha kawei na ki skul shimet hapoh ka shnong ka jong ngi.Hadien ba ngi la ioh jingtip halor kane, khyndiat ngut na ngi kaba kynthup ia u president jong ka shnong ngi la kyrpad ia ki ba kin pynsangeh ia kane ka jingialang bad maham ruh ia ki ba kim dei satia ban pynlong ia kino kino ki jingialang kiba iadei bad ka Meghalaya hapoh ki jaka pud jong ka Assam,” ong u nongialam shnong u Sanjit Rabha.
“Hynrei, kine ki briew na Meghalaya ki la sdang ban ia nia bad kam ba ka dei ka jaka ka jong ngi bad pyrshang ruh ban thombor ia ngi.Kumta ngi la phetkrad noh mardor na kane ka jaka bad shongrieh sha ka jaka kaba shngain,” ong shuh shuh utei u nongialam shnong.
“Ki briew na Meghalaya ki la pyrshang ban seng skul hapoh ka shnong Bhalukmari, Assam ia kaba yn pyniaid da ka sorkar Meghalaya.Kumta, ngi la leit sha katei ka jaka ban pynsangeh ia ki hadien ba katei ka jingjia ka la wan jia,” ong u president jong ka shnong u Ruhini Kumar Rabha
Khyndiat por hadien jong kane ka jingjia, ka kynhun ki pulit Assam hapoh ka jingialam u incharge ka Boko Police Station u Phanindra Chandra Nath bad u Revenue Circle Ophisar ka Boko u Dibash Bordoloi ki la hiar sha katei ka shnong bad pynlong ka jingiakren bad ki briew na baroh ki ar jylla.
“Namar ki katto katne ki jingsngewthuh bakla kila wanrah ia kane ka jingjia, hynrei mynta la lah ban tehlakam ia ka jinglong jingman bad ngi la iakren sani bha halor kane ka phang khnang ban lah ban pynneh ia ka shongsuk shongsain,” ong utei u Revenue Ophisar ka Boko.
