Barpeta, K’lyngkot 06 :U Bablu Das uba dei u doktor uba trei hapoh Barpeta Civil Hospital ha Kolgachia ula ngat ha ka jingshah thombor hapoh kane ka hospital hynnin ka 5 tarik u Kyllalyngkot 2023, bad halor kane ka jingjia ki la don laingut ki briew kiba donkti kiba la shah kem noh ha ki pulit.
Katkum ki khubor la iathuh ba kane ka jingjia ka la wan jia hapoh Barpeta Civil Hospital ha Kolgachia hadien ba utei u doktor ula ngat ha ka jingshah thombor ha kiba haiing hasem jong uwei u nongpang.
Kane ka jingshah ktahkti jong une u doktor uba dang don hapdeng ka kam kala wanrah ruh ka jingkhihwin ha baroh ki bynta jong ka thain Kolgachia.
Lah ban kdew hadien ba kiba haiing hasem jong uwei u nongpang ki la kyntu ia u doktor Babul Das ha kaba iadei bad u doktor Zakir Hussain, une u doktor hapoh ka tnat pynkha khunlung ruh ula batai bniah halor kane, hynrei na ka liang kitei kiba haiing hasem jong utei u nongpang kila ktahkti pynban ia une u doktor halor ka jingkynnoh ba une u doktor um shym la batai bniah ha ka rukom kaba dei.
Haba kren sha ki lad pathai khubor, une u doktor uba shah thombor ula ong ba kila don kumba 4-5 ngut ki briew kiba la wan kylli ia u doktor akir Hussain ha kaba ula jubab ba kin leit peit sha kawei pat ka kamra lada kim leit ban kylli na ka jaka rung.
Nalor kata une u doktor ula kam ruh ba kine ki runar kila rung jubor sha ka kamra jong ki nongpang kiba dei ki kynthei ha kaba kila kam ba ka rukom leh jong une u doktor kam long ha kata ka rukom kaba sngewtynnad ha kaba kila thombor noh ia u.
Katkum ki pulit la iathuh ba kitei ki briew kiba la shah kynnoh donkti ha katei ka kam thombor ki dei ruh kiba la don dak sniew bad kiba la ju shong phatok teng halor kiwei pat ki kam bymman.
Haba kren sha ki lad pathai khubor u doktor Nazirul Islam uba dei u superintendent jong ka hospital, ula ong ba u doktor Bablu Das ula jubab ia ka jingkylli jong ki nongbuh jingkylli ha ka rukom kaba dei hynrei um lah ban tip balei ba kane ka jingjia kala wan jia.
U Ohab Ali, u Jahangir Alam bad uMonirul Ali kiba donkti ha kane ka kam thombor ki la shah kem noh ha ki bor pulit ka Kolgachia hadien ka jingujor FIR da ki doktor bad ka jingtohkit pyrshah ia ki ka la iaid shakhmat.
Ha kawei pat ka bynta na ka liang ki trai shnong ha Kalgachia kila pynrem jur halor kane ka jingjia bad dawa ban pynshitom pyrshah ia kitei ki runar kiba donkti ha katei ka kam thombor.
