Yn myntoi haduh 4611 ki longiing na ki 10 shnong ka thain Mairang
Mairang, K’lyngkot 5: U Lamphang ka Iing Dorbar Thaw Ain ka jylla Meghalaya Bah Metbah Lyngdoh, hynne ka sngi palei u la buh ia u mawnongrim ban pyntrei ia ka Greater Mairang Water Supply Scheme (GMWSS) kaban ai jingshakri sha ki 10 tylli ki shnong ka thain Mairang, kaba hap hapoh ka Jal Jeevan Mission (JJM).
Ia une u mawnongrim la buh ha ka jingialang bala pynlong da ka tnat PHE jong ka sorkar jylla ha Tirot Sing Memorial Hall Pyndengumiong, Mairang ha ka jingiadonlang u Myntri ka Tnad PHE Bah Renikton Lyngdoh Tongkhar, u Deputy Commissioner ka Eastern West Khasi Hills Bah W Nongsiej bad kiwei kiwei.
Haba ai jingkren, u Lamphang u la ai khublei ia u Myntri ka Tnad PHE bad kumjuh ia baroh ki ophisar bad nongtrei ka tnat PHE, na ka bynta kane ka skhim ia kaba la ioh ban buh mawnongrim ha kane ka sngi. U la kyntu ruh ia ki paidbah kynthup ia ki nongialam shnong bad ki paidbah nongshong shnong, ba kin iatreilang ryngkat ryngkat bad ka tnat PHE jong ka sorkar ha ka por jong ka jingpyntrei ia kane ka skhim ia kaba yn sa sdang noh shen.
Haba kren halor ka jingkordor jong ka um ha ka jingim ba man ka sngi, u Bah Metbah u la kyntu ia ki paidbah nongshong shnong kiba la wan sakhi ia kane ka prokram, ba kin tyngkai bad pyndonkam adkar ia ka um bad ban sumar iaki tyllong um.
U la ong ruh ba ia ka Jal Jeevan Mission (JJM) la buh dak da ka sorkar kmie ban pynkut ha u snem 2024. Kumta u la buh jingkyrpad ia baroh kiba iadonbynta na ka liang jong ka sorkar, na ka liang ki nongialam shnong bad ki paidbah nongshong shnong ba kin iatrei shitrhem, khnang ba yn ioh ban pyndep ia kane ka skhim sam um katkum ka por ba la buh.
Lah ban kdew hangne ba ka Greater Mairang Water Supply Scheme kan pynpoi um sha ki 4611 tylli ki longiing jong ki 10 tylli ki shnong ka thain Mairang kiba kynthup ia ka shnong Pyndengumiong A, Pyndengumiong B, Mairang Mission, Mairangbah, Lumsohkhlur, Mawlong, Sangshong, Madan Bynther, Umthied Bynther bad Nongbah Bynther. Lyngba kane ka skhim yn pynpoi um ruh sha ki jaka pule, ki jaka sumar nongpang, ki iing anganwadi bad ki iing dorbar jong ki shnong kumjuh.
